(ආරියරත්න රණබාහු)

 
පාර්ලිමේන්තුව විසුරුවා හැරීමට නියමිත කාලයට පෙර මහ මැතිවරණයකට යාමේ කිසිදු අපේක්ෂාවක් එක්සත් ජාතික පෙරමුණට නැතැයි ඩිජිටල් යටිතල පහසුකම් සහ තොරතුරු තාක්ෂණ කැබිනට් නොවන ඇමැති අජිත් පී පෙරේරා මහතා පැවසීය.

ශ්‍රීලනිප ප්‍රමුඛ එක්සත් ජනතා නිදහස් සන්ධානයේ ඇතැම් මන්ත්‍රීවරුන් පිරිසක් රටේ දේශපාලන අවිනිශ්චිතාවයක් ඇති කිරිම සඳහා හදිසි මහ මැතිවරණයක් පිළිබඳ විවිධ අදහස් ප්‍රකාශ කරන බව කී ඇමැතිවරයා ඒ සඳහා තුනෙන් දෙකක මන්ත්‍රීවරු සංඛ්‍යාවකගේ සහභාගීත්වයෙන් යෝජනාවක් සම්මත කර ගන්නා බවත් ඊට එක්සත් ජාතික පෙරමුණු මන්ත්‍රීවරු සහය දෙන බවත් කිය ඇතත් එය සම්පුර්ණ අසත්‍යයක් බව කීය.


එක්සත් ජාතික පෙරමුණේ කිසිදු මන්ත්‍රීවරයකු එවැනි යෝජනාවකට සහය නොදෙන බවද ඇමැතිවරයා අවධාරණය කළේය.
මෙම ආණ්ඩුවට  2020 පෙබරවාරි 17 වැනි දා වන විට වසර 4 ½ ක් සපිරෙන බව කී ඇමැතිවරයා ඒ අනුව නියමිත කාලය දක්වා ආණ්ඩුව අඛණ්ඩව ගෙන යන බව ද පැවසීය.


කෙසේ වෙතත් ව්‍යවස්ථානුකූලව පාර්ලිමේන්තු මහ මැතිවරණයට පෙර ජනාධිපතිවරණය පැවැත්විය යුතුව ඇතැයි ද ඇමැතිවරයා කීය.

කොල්ලුපිටියේ පිහිටි අමාත්‍යංශයේ දී අද (27) පස්වරුවේ පැවති මාධ්‍ය හමුවකදී ඇමැතිවරයා මෙම කරුණු සඳහන් කළේය.