“7 වැනි දෙරණ සිනමා සම්මාන උළෙලේදී” වසරේ හොඳම අධ්‍යක්ෂණය ඇතුළු සම්මාන 5 ක් හිමිකරගත් සංජීව පුෂ්පකුමාර අධ්‍යක්ෂණය කළ ‘දැවෙන විහඟුන්’(Burning Birds)  චිත්‍රපටය ප්‍රේක්ෂක ඉල්ලීම මත යළිත් වතාවක් අද (12) සිට සීමිත සිනමාශාලා කිහිපයක ප්‍රදර්ශනය කිරීමට කටයුතු යොදා තිබේ. 

ඒ අනුව කොළඹ රීගල් (ප.ව. 2.00) බොරැල්ල - ලිඩෝ (දිනපතා ප.ව.4.15 සහ සෙනසුරාදා ඉරිදා පස්වරු 4.15/7.00) වැල්ලවත්ත - සැවෝයි ප්‍රිමියර් (ප.ව. 4.15) යන සිනමාශාලාවල තිරගතකරේ.

“දැවෙන විහඟුන්” චිත්‍රපටය “දෙරණ සම්මාන උළෙලේදී” වසරේ හොඳම අධ්‍යක්ෂණය වසරේ හොඳම නිළිය වසරේ හොඳම සහාය නිළිය, වසරේ හොඳම සහාය නළුවා, වසරේ හොඳම වේශ නිරූපණ ශිල්පියා යන සම්මාන හිමිකරගත් අතර, එහිදී වසරේ හොඳම කැමරාකරණය, වසරේ හොඳම සංගීතය, වසරේ හොඳම තිර රචනය, යන සම්මාන සඳහාද නිර්දේශ වීම විශේෂත්වයකි. එමෙන්ම 
පසුගියදා නිමාවූ ‘9 වැනි සාර්ක් සිනමා උළෙලේදී’ හොඳම නිළිය හා හොඳම සංස්කරණය යන සම්මාන ද්විත්වයද හිමිකරගැනීමට සමත්විය.

දැවෙන විහඟුන් චිත්‍රපටය මීට පෙර ජිනීවාහි ‘15 වැනි මානව හිමිකම් ජාත්‍යන්තර චිත්‍රපට උළෙලේදී’ හොඳම චිත්‍රපටය ලෙසත්, යොවුන් ජූරි සම්මානයත්, ටෝකියෝ හි ‘17 වැනි ෆිල්ම්ටෙක්ස් ජාත්‍යන්තර සිනමා උළෙලේදී’ විශේෂ ජූරි සම්මානයත්, ලොස් ඇන්ජලීස්හි ‘3 වැනි ලෝක ආසියා චිත්‍රපට උලෙලේදී’ හොඳම නිළිය සම්මානයත් හිමිකරගන්නා ලදී.

- යහම්පත්