(නිමන්ති රණසිංහ, ඩබ්ලිව්. කීර්ති සහ හියුබට් ප්‍රනාන්දු)

හෙරොයින් මත්ද්‍රව්‍ය ජාවාරමෙන් රුපියල් කෝටි ගණන් වටිනා දේපළ උපයා ගනිමින් මුදල් විශුද්ධිකරණ පනත ප්‍රකාරව වරදක් සිදු කළැයි රක්ෂිත බන්ධනාගාර ගත කර සිටින රුවන් චමිල නොහොත් “දෙමටගොඩ රුවන්” නමැත්තාට අයත් මීගමුව පිටිපන පාරේ පිහිටි රුපියල් කෝටි 40කට අධික වටිනාකමකින් යුත් සුඛෝපභෝගි හෝටලයක් අපරාධ පරීක්ෂණ දෙපාර්තමේන්තුවේ නිතිවිරෝධී වත්කම් විමර්ශන කොට්ඨාසය විසින් අද (24) පස්වරුවේදී සිය භාරයට ගෙන තිබේ.

චෙකොස්ලෝවේනියානු ජාතිකයෙකු විවාහ කරගෙන සිටින මෙරට කාන්තාවකට අයත් මෙම දේපල සැකකාර දෙමටගොඩ රුවන් නැමැත්තා මිලට ගෙන ඇත්තේ මීට වසර හතරකට පමණ පෙර බවට කරුණු හෙළිවූ බව අපරාධ පරික්ෂණ දෙපාර්තමේන්තුව සදහන් කරයි.

පර්චස් 100කට ආසන්න භූමි ප්‍රමාණයක පිහිටි මෙම භූමිය මීගමුව මුහුදු වෙරළට මුහුණ ලා පිහිටි අති සුඛෝපභෝගී ගොඩනැගිල්ලක් සහිත ස්ථානයක් බව ද අපරාධ පරික්ෂණ දෙපාර්තමේන්තුව පවසයි.

සැකකාර දෙමටගොඩ රුවන් නැමැත්තා නිති විරෝධී අන්දමින් උපයා ගත් දේපලවල වටිනාකම රුපියල් කෝටි 79කට අධික බව මේ වන විට හෙළිකරගෙන ඇතැයි අපරාධ පරීක්ෂණ දෙපාර්තමේන්තුව සදහන් කරයි.

අපරාධ පරික්ෂණ දෙපාර්තමේන්තුවේ නියෝජ්‍ය පොලිස්පති ඩබ්ලිව්. තිලකරත්න, එම දෙපාර්තමේන්තුවේ නිතිවිරෝධී වත්කම් විමර්ශණ කොට්ඨාසයේ අධ්‍යක්ෂ ජ්‍යෙස්ඨ පොලිස් අධිකාරී ලක්සිරි ගීතාල්, එහි සහකාර පොලිස් අධිකාරී අනුර ප්‍රේමරත්න යන නිලධාරින්ගේ උපදෙස් මත එම කොට්ඨාසයේ ප්‍රධාන පොලිස් පරීක්ෂක සම්පත් රාජකරුණා මහතා ඇතුලු නිලධාරීහු කණ්ඩායමක් මෙම වැටලීම සිදුකළහ.