(සුජිත් හේවාජුලිගේ )

දක්ෂිණ අධිවේගී මාර්ගයේ කොවිඩ් අවදානම හේතුවෙන් වසා දැමුණු කොට්ටාව සහ කඩුවෙල පිවිසුම්වලදොරටු අටක් අද සිට විවෘත කෙරුණු බව මාර්ග සංවර්ධන අධිකාරිය පවසයි.

කඩුවෙල පිවිසුමේ ඇතුළුවීමේ දොරටු දෙකක් හා පිටවීමේ දොරටු දෙකක්ද කොට්ටාව පිවිසුමේ ඇතුළුවීමේ දොරටුවක් හා පිටවීමේ දොරටුවක්ද මෙසේ විවෘත කරනු ලැබ ඇත.

එම පිවිසුම්වල සෙසු දොරටුද ඉදිරි දිනවලදී විවෘත කරන බව දක්ෂිණ අධිවේගී මාර්ගයේ අධ්‍යක්ෂ (නඩත්තු හා මෙහෙයුම්) මිහාල් ලොඩ්වික් මහතා පැවසීය.

දක්ෂිණ අධිවේගී මාර්ගයේ කොතලාවල,වැලිපැන්න හා ඉමදූව පිවිසුම්ද කොවිඩ් අවදානම හේතුවෙන් වසා දමනු ලැබ ඇත. එම පිවිසුම්ද තවත් දින කිහිපයකින් විවෘත කිරීමට මාර්ග සංවර්ධන අධිකාරිය බලාපොරොත්තු වෙයි.

දක්ෂිණ අධිවේගී මාර්ගයේ සේවකයන් රැසකට කොවිඩ් ආසාදනය වූ අතර මින් වැඩි පිරිසකගේ නිරෝධායන කාලය ඉදිරි දින කිහිපයේදී අවසන් වීමට නියමිතය.

මේ අතර සංචරණ සීමා නිසා දක්ෂිණ අධිවේගී මාර්ගයේ රථ වාහන ධාවනය අඩුවීමෙන් එහි ආදායම සැලකියයුතු ලෙස ලෙස පහත බැස ඇතැයි මාර්ග සංවර්ධන අධිකාරියේ නිලධාරීහු පවසති.

දක්ෂිණ අධිවේගී මාර්ගයේ ක්‍රියාත්මක කිරීම සඳහා විශේෂ සෞඛ්‍ය මාර්ගෝපදේශ මාලාවක් සෞඛ්‍ය අංශ විසින් පසුගියදා නිකුත් කරනු ලැබීය.