(අජන්ත කුමාර අගලකඩ)

තුර්කි සමාගමකට අයත් විදුලි බලාගාර දෙකකින් විදුලිය මිලදී ගැනීම සම්බන්ධයෙන් නීතිපති වාර්තාව සහ මහජන උපයෝගිතා කොමිසන් සභාවෙන් අනුමැතිය දී ඇති වාර්තාව කැබිනට් මණ්ඩලයට ඉදිරිපත් කරන්නැයි ජනාධිපති මෛත්‍රීපාල සිරිසේන මහතා විදුලි බල හා බලශක්ති ඇමැති රවී කරුණානායක මහතාට අද (06) පෙරවරුවේ දී  දැනුම් දී ඇත.

ජනාධිපති කාර්යාලයේ අද (06) උදේ පැවැති කැබිනට් රැස්වීමේදී ජනාධිපතිවරයා මෙම දැනුම් දී ඇත.

කොළඹ වරායේ සහ ගාලු වරායේ නවතා තිබෙන නැව් දෙකක සවිකෙරෙන විදුලි බලාගාර දෙකකින් මෙගාවොට් 320 ක විදුලිය මිලදී ගැනීම සඳහා ඇමැති රවී කරුණානායක මහතා විසින් ඉදිරිපත් කරන ලද කැබිනට් සංදේශයකට මුදල් ඇමැති මංගල සමරවීර මහතා අද දිනයේදී විරෝධය පළකර ඇතැයි වාර්තාවේ.

මෙම යෝජනාව මීට පෙර අවස්ථා කිහිපයකදීම ඉදිරිපත් වී තිබූ නමුත් ඊට නීතිපතිවරයාගේ අනුමැතියක් නැතැයි කියමින් මංගල සමරවීර ඇමැතිවරයා විරෝධය පළකර තිබිණි.

කැබිනට් සංදේශය ඊයේ දිනයේදී සාකච්ඡාවට ගත් අවස්ථාවේ ඊට නීතිපතිවරයාගේ අනුමැතියක් ගෙන මහජන උපයෝගිතා කොමිසන් සභාවේ අනුමැතියක් නැතැයි කියමින් මංගල සමරවීර ඇමැතිවරයා විරෝධය පළකර ඇතැයි වාර්තාවේ.

ඒ අනුව අදාළ ව්‍යාපාරයක් සම්බන්ධයෙන් නීතිපතිවරයාගේ වාර්තාව සහ මහජන උපයෝගිතා කොමිසන් සභාවේ අනුමැතිය දී ඇති වාර්තාව ලබන සතියේදී කැබිනට් මණ්ඩලයට ඉදිරිපත් කරන්නැයි ජනාධිපතිවරයා දැනුම් දී ඇත.