(හර්ෂණ තුෂාර සිල්වා)

එකම අදහස ඇති වගන්ති නිසා සිදුවන අර්බුද වළක්වා ගැනීමටත් වගන්තිවල ඇති පරස්පරතාව මඟ හරවා ගැනීමටත් ජනාධිපතිවරයා තෝරා පත් කරගැනීමේ පනත සංශෝධනය කළ යුතු යැයි යුරෝපා සංගම් මැතිවරණ නිරීක්ෂණ දූත කණ්ඩායම කොළඹදී අද (24) ප්‍රකාශ කළේය.

මැතිවරණ කොමිෂන් සභාවට ආණ්ඩුක්‍රම ව්‍යවස්ථාවෙන් ලබා දී තිබෙන බලතල ශක්තිමත් කිරීමට පියවර ගත යුතු බවද යුරෝපා සංගම් මැතිවරණ නිරීක්ෂණ දූත කණ්ඩායම කීවේය.

කොළඹ හිල්ටන් හෝලයේ පැවැති මාධ්‍ය හමුවකදී සිය අවසන් වාර්තාව සහ නිර්දේශයට පත් කරමින් යුරෝපා සංගම් මැතිවරණ නිරීක්ෂණ දූත කණ්ඩායම ඒ බව සඳහන් කළේය.

යුරෝපා සංගම් මැතිවරණ නිරීක්ෂණ දූත කණ්ඩායම ඔක්තෝබර් 11 වැනිදා සිට දෙසැම්බර් 12 වැනිදා දක්වා ජනාධිපතිවරණ ඡන්ද විමසීමේ නිරීක්ෂණ කටයුතුවල නිරත වූ අතර නොවැම්බර් 18 වැනිදා ඔවුන්ගේ මූලික වාර්තාව ඉදිරිපත් කරන ලදි.

මැතිවරණ කොමිෂන් සභාවේ ආරාධනයක් අනුව ජනාධිපතිවරණ ඡන්ද විමසීමේ නිරීක්ෂණ කටයුතු වලට පැමිණි බවත් මේවා නිර්දේශ පමණක් බවත් ක්‍රියාත්මක කිරීම, පිළිගැනීම හෝ අහක දැමීම හෝ ශ්‍රී ලංකා රජයේ, ආණ්ඩුවේ සහ පාර්ශවකරුවන්ට අයත් කරුණක් බවත් අවසන් වාර්තාව සහ නිර්දේශ ප්‍රකාශයට පත් කරමින් යුරෝපා සංගම් මැතිවරණ නිරීක්ෂණ දූත කණ්ඩායමේ ප්‍රධානී මරිසා මටියාස් මහත්මිය කීවාය.

“සාම්ප්‍රදායික මාධ්‍ය මෙන්ම සමාජ මාධ්‍යවල ව්‍යාප්ත වූ වාංග්ලංකාර,  වෛරී ප්‍රකාශ , අසත්‍ය තොරතුරු යනාදිය මධ්‍යයේ වුවද ශ්‍රී ලංකා මැතිවරණ කොමිෂන් සභාව ඉතා ඉහළ වෘත්තීය මට්ටමකින් සාමකාමීව ජනාධිපතිවරණය පැවැත්වීමට සමත් වුණා. මැතිවරණ ප්‍රචාරණ ව්‍යාපාරයට මුදල් යෙදවීම සම්බන්ධයෙන් නීතියක් නොමැති වීම නිසාත් රාජ්‍ය සහ පෞද්ගලික මාධ්‍යවල පක්ෂපාතී වාර්තාකරණය නිසා අපේක්ෂකයන් සියලු දෙනාට සම අවස්ථා හිමිවුණේ නැහැ.

බොහෝ අපේක්ෂකයන්ට ඔවුන්ගේ පණිවුඩය ලබාදීමට අවස්ථාවක් ලැබුණේ නැහැ” ඇය පැවැසුවාය.

යුරෝපා සංගම් මැතිවරණ නිරීක්ෂණ දූත කණ්ඩායම සිය අවසන් වාර්තාව මඟින් නිර්දේශ 23 ක් ඉදිරිපත් කර තිබෙන ඉන් හයකට ප්‍රමුඛත්වය දී තිබේ.

ඒ අනුව මැතිවරණ කොමිෂන් සභාවට බලතල දෙමින් එය ශක්තිමත් කිරීම, ජනාධිපතිවරයා තෝරා පත්කරගැනීමේ පනත සංශෝධනය කිරීම, මැතිවරණ ප්‍රචාරණයට වියදම් කරන මුදල් සම්බන්ධයෙන් නීතියක් ගෙනඒම, සියලු දෙනාට සම මැතිවරණ ප්‍රචාරණ අවස්ථා ලබාදීමට නීති සංශෝධනය කිරීම, මැතිවරණ පරිපාලනය සහ මැතිවරණ කොමිෂන් සභාව ෆේස්බුක් ආදී සමාජ මාධ්‍ය ජාල අතර නිල සහයෝගීතාවයක් ගොඩනගා ගැනීම සහ කාන්තාවන්ගේ මහජන සහ දේශපාලන සම සහ ඉහළ සහභාගීත්වය වැඩි කිරීම සඳහා ආණ්ඩුක්‍රම ව්‍යවස්ථාවෙන් තිබෙන බාධක ඉවත් කර විශේෂ ක්‍රියාමාර්ග ගැනීම කෙරෙහි අදාළ ප්‍රමාඛ නිර්දේශ හයෙන් යෝජනා කර තිබේ.

ආණ්ඩුක්‍රම ව්‍යවස්ථාවෙන් මැතිවරණ කොමිෂන් සභාවට පුළුල් බලතල ලබා දී තිබුණත් මැතිවරණ කොමිෂන් සභාවේ ආණ්ඩුක්‍රම ව්‍යවස්ථානුකූල බලතල මොනවාදැයි පැහැදිලි කරමින් නීතියක් සම්මත කරගැනීමට පාර්ලිමේන්තුවට නොහැකි වීම නිසා මැතිවරණ කොමිෂන් සභාවේ බලතල සීමා වූ බව ද යුරෝපා සංගම් මැතිවරණ නිරීක්ෂණ දූණ කණ්ඩායම් අවසන් වාර්තා වේ සඳහන් වේ.

අර්ථ ව්‍යාකූල වීම වැළැක්වීමටත්, අර්ථ නිරූපණ අතර ගැටුම් ඇතිවීම වැළැක්වීමටත් එමෙන්ම නව නීතී සහ වර්තමානයට ගැලපෙන පරිදිත් ජනාධිපතිවරයා තෝරාපත් කරගැනීමේ පනත සංශෝධනය කළ යුතු යැයි ද එහි දැක්වේ.

අවසන් වාර්තාව විදේශ සබඳතා අමාත්‍යාංශයට සහ මැතිවරණ කොමිෂන් සභාවට බාරදෙන බවත් ඉදිරි දින කිහිපයේදී ආණ්ඩුව, විපක්ෂය ඇතුළු දේශපාලන කණ්ඩායම්, සිවිල් සමාජ ක්‍රියාකාරීන් ඇතුළු මැතිවරණයට සම්බන්ධ පාර්ශවකරුවන් හමුවී සාකච්ඡා පවත්වන බවත් මරිසා මටියාස් මහත්මිය තවදුරටත් කීවාය.