බිඟුන් මේනක ගමගේ 

මාළිගාවත්ත වකුගඩු මධ්‍යස්ථානයේ රුධිර කාන්දුකරණයට පැමිණ පැය ගණනක් තිස්සේ එහි පිටත රැඳී සිටින්නට සිදුවීම නිසා තමන් දැඩිසේ අසරණභාවයට පත්ව ඇතැයි එම රෝගීහු පවසති.

විෂබීජවලින් ආරක්ෂා කරගත යුතු සංවේදී රෝග ප‍්‍රජාවක් වුවත් මාලිගාවත්ත වකුගඩු මධ්‍යස්ථානය අවට අනාරක්ෂිත පරිසරයකට විවෘත වීම නිසා සිය ජීවිත අවදානමට පත්ව ඇතැයි ද ඔවුහු පවසති.

වෙනදා සිදුකළ කාන්දුකරණ කටයුතු කොවිඞ් 19 වයිරසය හේතුවෙන් රාත‍්‍රී කාලයේ ද දැන් ක‍්‍රියාත්මක යැයි පවසන ඔවුහු මේ නිසා ඇතැම්විට රෝගීන්ට තමාට ලබා දී ඇති වේලාව පසු වී පැය ගණනක් ගත වී පසු දිනය වනතුරු ද එහි පිටත රැඳී සිටීමට සිදුව ඇතැයි චෝදනා කරති.

මේ සම්බන්ධයෙන් එම මධ්‍යස්ථානයේ අධ්‍යක්ෂවරයා දුරකථනයට සම්බන්ධ කරගැනීමට අවස්ථා කීපයකදීම උත්සාහ කළ ද සාර්ථක නොවීය.

අධ්‍යක්ෂවරයා වෙනුවෙන් පිළිතුරු දුන් නිලධාරියකු පැවසුවේ අධ්‍යක්ෂවරයාගෙන්ම මිස වෙනත් අයකුගෙන් විමසීමෙන් පලක් නැති බවය.

මෙම තත්ත්වය දරුණු වී ඇත්තේ රෝගීන්ට වකුගඩු මධ්‍යස්ථානයට සිය කාන්දුකරණ කටයුත්තට අදාළ වේලාව නිසියාකාරව සන්නිවේදනය නොකිරීමෙන් යැයි ද මෙය තනිකරම එහි පරිපාලන ගැටලූවක් යැයි ද එම මධ්‍යස්ථානයේ නිලධාරියෙක් පැවැසීය.

රුධිර කාන්දුකරණයට පැමිණෙන රෝගීන්ට කාන්දුකරණයට අදාළ වේලාව හරියාකාරව දැනුම් දීමේ සන්නිවේදන ක‍්‍රමයක් සකසාගැනීමෙන් පහසුවෙන්ම මීට විසඳුමක් දිය හැකිව තිබියදී පරිපාලනය එය නොතකා හැරීමෙන් වකුගඩු රෝගීන්ගේ ජීවිත නිකරුණේ අනතුරේ හෙලා ඇතැයි ද එම නිලධාරියා කීය.

මේ සම්බන්ධයෙන් සෞඛ්‍ය බලධාරින්ගේ කඩිනම් අවධානය යොමු විය යුතු යැයිද එසේ නොවුවහොත් කොවිඞ් නොවන මරණ නිසා රෝගී ජීවිත නිකරුණේ බිලිදීමක් සිදුවනු ඇතැයි ද එම නිලධාරියා වැඩිදුරටත් සඳහන් කළේය.