(ඩයනා උදයංගනී)

කොරෝනා වයිරස ව්‍යාප්තිය හේතුවෙන් මාසයක පමණ කාලයක් තිස්සේ සම්පූර්ණයෙන්ම නවතා දැමුණු දුම්රිය හා බස්රථ ධාවනය හෙට (20) සිට ආරම්භ කෙරෙන්නේ දැඩි කොන්දේසි හා සීමා යටතේ බව මගී ප්‍රවාහන කළමනාකරණ අමාත්‍යාංශය පවසයි.

අත්‍යාවශ්‍ය සේවාවන්හි නිරත හා විවෘත කෙරෙන කාර්යාලවල සේවකයන් සඳහා මෙම පොදු ප්‍රවාහන සේවාවන් ආරම්භ කෙරෙන බවද එම අමාත්‍යාංශය සඳහන් කරයි.

ඒ අනුව එක් බස් රථයක ගමන් කළ හැකි මගීන් සංඛ්‍යාව 25කටත්, දුම්රිය මැදිරියක ගමන් කළ හැකි මගීන් සංඛ්‍යාව 50කටත් සීමා කර තිබේ.

ලංකා ගමනා ගමන මණ්ඩලයේ නියෝජ්‍ය සාමාන්‍යාධිකාරී (ධාවන) පණ්ඩුක ස්වර්ණහංස මහතා පැවසුවේ ධාවනය කෙරෙන සියලු බස්රථ විෂබීජ හරණයට ලක්කර ධාවනය කෙරෙන බවයි.

බස් රථයක ගමන් කළ හැකි මගීන් සංඛ්‍යාව ගමන් කළ හැක්කේ සමස්ත මගී ධාරිතාවයෙන් සියයට 50කට පමණක් බව ද ඔහු සඳහන් කළේය.

එමෙන්ම දුම්රිය ස්ථානවලට ඇතුළු වන හා දුම්රියේ ගමන් කරන මගීන් වුහුණු ආවරණ පැළඳීම අනිවාර්ය වන අතර දුම්රිය ස්ථාන තුළ, මැදිරි තුළ හා දුම්රිය මාර්ගයට කෙළ ගැසීම සම්පූර්ණයෙන් තහනම් බව දුම්රිය ගමනාගමන අධිකාරී ගාමිණී සෙනෙවිරත්න මහතා පැවසීය.

එම කරුණු පිළිනොපදින පුද්ගලයින්ට එරෙහිව අධිකරණ ක්‍රියාමාර්ග ගන්නා බව ද ඔහු සඳහන් කළේය.

එමෙන්ම දුම්රිය තුළ සිඟමන් යැදීම සහ අනවසර වෙළඳාම ද තහනම් කර ඇති අතර එලෙස වෙළඳාම් කරන අයගෙන් භාණ්ඩ මිලදී ගන්නා අයද දුම්රියෙන් ඉවත් කරන බව දුම්රිය ගමනාගමන අධිකාරීවරයා කීවේය.

කැස්ස, උණ සහ සෙම්ප්‍රතිශ්‍යාව වැනි රෝග ලක්‍ෂණ ඇති අය දුම්රියෙන් ගමන් නොකරන්නැයි ඉල්ලීමක් කරන බව ද ඔහු පැවසීය.