මැලේසියාවේ අද (15) දිනයේ නව කොරෝනා රෝගීන් 190 ක් වාර්තා වී ඇත. 

මොවුන්ගෙන් වැඩි දෙනකු විදේශිකයන්  සමඟ 10,000 කට අධික පිරිසක් සහභාගී වූ ආගමික උත්සවයකට සම්බන්ධ වූ අය බව අණාවරනය වී තිබේ.

මෙම නව රෝගීන් පිරිස සමඟ රටේ මුළු ආසාදන සංඛ්‍යාව 428 දක්වා ඉහළ ගොස් ඇති බව සෞඛ්‍ය අමාත්‍යාංශය නිවේදනයක් නිකුත් කරමින් කියා සිටී.

මෙම උත්සව අවස්ථාවට සහභාගී වූ සියලුම දෙනා සහ ඔවුන්ගේ සමීපතමයන් දින 14 ක අනිවාර්ය නිරෝධායනය සඳහා යෙමුකරන බව ද අමාත්‍යාංශය පවසයි.

පෙබරවාරි 11, 27 සහ මාර්තු 1 යන දිනවල ක්වාලාලම්පූර් අසල මුස්ලිම් පල්ලියක පැවති ආගමික රැස්වීමකට 16,000 ක පමණ පිරිසක් සහභාගී වූ බව මැලේසියානු සෞඛ්‍ය බලධාරීහු පවසති. සහභාගී වූවන්ගෙන් 14,500 ක් පමණ මැලේසියානු ජාතිකයෝ වෙති.

මැලේසියානු අගමැති මුහයිඩින් යසින් සිකුරාදා කියා සිටියේ තම රට ආසාදන හා ආර්ථික කඩාවැටීම් පිළිබඳ අනතුරු ඇඟවීම්වලට මුහුණ දී සිටින බවයි.

අසල්වැසි බෲනායි හි ද සෙනසුරාදා වන විට වාර්තා වූ රෝගීන් 40 දෙනෙකුගෙන් 38 දෙනෙකු ආගමික රැස්වීම්වලට සම්බන්ධ වූ අය බවට සොයාගෙන ඇත.

මාධ්‍ය සඳහන් කරන්නේ සිංගප්පූරුවේ ද මෙවැනි සිද්ධීන් වාර්තා වී ඇති බවයි.

(රොයිටර් පුවත් ඇසුරිණි - 085)