වේදනාකාරි ඉන්සියුලින් එන්නත වෙනුවට දියවැඩියා රෝගිනට වඩාත් හොඳින් ක්‍රියාත්මක වන ස්වයංක්‍රීය අලවනයක් හඳුන්වාදීමට ඇමෙරිකානු පර්යේෂණ කණ්ඩායමක් සමත්ව සිටියි.

එමගින් අවශ්‍ය අවස්ථාවේ දී පමණක් රුධිරයට ඉන්සියුලින් නිකුත් කරයි.

ඉතා කුඩා සහ සියුම්ව නිපදවා ඇති මේ උපකරණයට පුද්ගලයකුගේ රුධිරයේ ඇති සීනි ප්‍රමාණය හඳුනාගත හැකිවීම ද ඒ අනුව ස්වයංක්‍රීයව අවශ්‍ය මාත්‍රාව නිකුත් කිරීමට හැකිවීම ද විශේෂත්වයකි.

හතරැස් හැඩයක් ගන්නා මේ අලවනය හෙවත් පැලැස්තරය ඉදිකටු සියයකට වැඩි ප්‍රමාණයකින් සමන්විතය.

ලෝකය පුරා දියවැඩියා රෝගීන් ලක්ෂ 3870ක් මේ වනවිට හඳුනාගෙන සිටියි. 2035 වනවිට එම ප්‍රමාණය ලක්ෂ 5920ක් දක්වා වැඩිවනු ඇතැයි ලෝක සෞඛ්‍ය සංවිධානය කියයි. පර්යේෂකයන් පවසන්නේ රුධිරයේ සීනි මට්ටම පාලනය කැරගැනීමට දිනපතා ඉන්සියුලින් එන්නත් කැර ගැනීම වේදනාකාරී මෙන් ම නිරවද්‍ය නොවූ ක්‍රමයක් බවයි.

නව සොයාගැනීමේ ඇති ඉතාමත් කුඩා ප්‍රමාණයේ ඉදිකටුවල අන්වීක්ෂීය ගබඩා ඒකක ලෙස ග්ලූකෝස් - සංවේදන එන්සයිම ඇත මේවා මගින් රුධිර ධාරාවේ ඇති සීනි ප්‍රමාණය ඉක්මවා ගිය විට වේගයෙන් ඉන්සියුලින් රුධිර ධාරාවට එක්කිරීම සිදුවෙයි. ඉන් සීනි මට්ටම පාලනය වෙයි.

මෙම පර්යේෂණ සම්බන්ධ තොරතුරු නැෂනල් ඇකඩමි ඔෆ් සයන්ස් හි පර්යේෂණ වාර්තා වල දක්වා ඇත. එම වාර්තාවේ දක්වා ඇත්තේ දැනට කරණ ලද පර්යේෂණ අනුව පැලැස්තරය සාර්ථක වී ඇතත් සෘජුව රෝගීන්ට හඳුන්වාදීමට පෙර එය තවදුරටත් සායනික පරීක්ෂණ සඳහා යොමුකළ යුතු බවයි.

මෙම පර්යේෂණයේ ප්‍රධානි ඇමරිකාවේ යූඑන්සි දියවැඩියා කාර්ය මධ්‍යස්ථානයේ ආචාර්ය ජෝන් බුස් පැවසුවේ වැරදි මාත්‍රාවක් ඉන්සියුලින් එන්නත් කිරීම මගින් අන්ධ බව ඇතිවීම, පාදවල දුර්වලතා ඇතිවීම වැනි සංකීර්ණ ගැටළු සහිත තත්වයන් හටගන්නා බවයි. සිනි මට්ටම පාලනය සඳහා සොයාගෙන ඇති නව පැලැස්තර දින කීපයක් භාවිතා කිරීමෙන් අනතුරුව ශරිරයෙන් මාරු කර යුතු බවද පර්යේෂණ කණ්ඩායම කියයි.