(කලවාන උපේන්ද්‍ර ප්‍රියංකර ජාතුංගම)
කතාකිරීමට නොහැකිව පැමිණි යාචකයා මුදල් ලබානොදුන් විට කතාකළ අපූරු පුවතක් ගම්බඳ ප්‍රදේශයකින් වාර්තා විය.

සිද්ධිය මෙසේය.

මේ දිනවලදී ප්‍රදේශයට පවතින වර්ෂාවත් සමග වෙළෙඳාම් සරු ලෙස සිදු නොවේ. කෙසේ වෙතත් සිදුවීම වූ දින උදෑසන තම ව්‍යාපාරය අසලට පැමිණි යාචකයා උගුර පෙන්වා කතා කිරීමට නොහැකි බව පවසා සිටි හෙයින් එම වෙළෙඳසල හිමි පුද්ගලයා ඔහුට අනුකම්පා කර මුදලක් ලබාදී තිබේ.

එහිදී ඒ යාචකයා පාන්දරම මත්පැන් පානය කර ඇති බව හැඟී ගිය හෙයින් “මේ මිනිහා සල්ලි හොයන්නේ කන්න නෙමෙයි බොන්නද කොහෙද” යැයි පවසා ඇත්තේ කඩයට පැමිණි කාන්තාවකටය. එවිට එම කාන්තාව “ඔය මනුස්සයා ටිකකට කලින් යසට කතාකළා. මම අර පැත්තේ ෆෝන් කඩයක ඉන්නකොට යසට කතාකරලා රුපියල් 299ක ඬේටා කාඞ් එකක් ගත්තා” යැයි කඩහිමියාට පවසා ඇත.

එවිට අල්ලපු කඩය දෙසින් ඇසුණු බහින්බස්වීමක් ඇසුණු කඩ හිමියා එදෙස විපරම් කරද්දී කතාකිරීමට නොහැකිව පැමිණි යාචකයා අල්ලපු කඩහිමියාට බැනවදිමින් යන අයුරු දක්නට ලැබී ඇත. ඒ සම්බන්ධව අල්ලපු කඩහිමියාගෙන් විමසූ විට පවසා ඇත්තේ, “මිනිහා බීලා ඉන්නේ. මගෙන් සල්ලි ඉල්ලුවාම මම බැහැ කිව්වා. පස්සේ මිනිහා කඬේ ෆොටෝ අරන් ෆේස් බුක් දානවා කියලා බැන බැන යන්න ගියා” කියාය.