මත්පැන් පානය කිරීම සඳහා මුදල් නුදුන්නේ යැයි තම බිරිය සමග උරණ වූ පුද්ගලයකු කේන්තිය පිරිමසා ගන්නට ගසක් මතට ගොඩවීමට තැත් කරද්දී එම ගසින් ඇද වැටී කොන්ද කඩාගෙන බිරියගේ පිහිටෙන්ම රෝහල්ගතවීමේ පුවතක් වාර්තා වෙයි. සිද්ධිය මෙසේය.

ඔහු මතට ඇබ්බැහිවූවෙකි. තම බිරිය අත මුදල් ඇතැයි දැනගත් හෙතෙම කටගොන්නක් බීගෙන නිවසට පැමිණ ඇගෙන් සුළු මුදලක් ඉල්ලා සිටියේ අත්‍යවශ්‍ය කටයුත්තක් ඇතැයි පවසමිනි. සැමියාගේ තරම දන්නා බිරිය එය එකහෙලාම ප්‍රතික්ෂේප කළේ “බොන්න දෙන්න මුදල් මා අත නැතැ”යි නෝක්කාඩුවක්ද පවසමිනි. මුදල් නොදීමෙන් උරණ වූ හෙතෙම කේන්තියෙන් වෙව්ලමින් නිවෙස අසල වූ සියඹලා ගසකට නැගීමට තැත්කළේ ‘බලා ගනින් අද මම කරන දේ’ යැයි පවසමිනි. නන් දොඩවමින් ගස මතට ගොඩවූ ඔහුට එහි රැඳී සිටින්නට හැකිවූයේ මිනිත්තු කීපයකි.

ගසේ රැඳෙන්නට වාරු නැතිවූ එක්වරම බිම ඇද වැටුණේ ඒ වනවිටත් නිවෙස අසලට රැස්ව සිටි පිරිසගේ මුවගට සිනා රැළි නංවමිනි. එහෙත් හිට ගන්නටවත් වාරු නැතිව කෑ මොර දෙන්නට පටන් ගත් මෙම පුද්ගලයා බිරිය ඇතුළු ගම්වාසීන් එක්ව ඒ මොහොතේම රෝහල්ගත කළ අතර පසුව දැන ගන්නට ලැබුණේ ගසින් ඇද වැටීමෙන් ඔහුගේ කොන්දට බරපතළ හානි සිදුව ඇති බවකි.

(වියලුව වාර්තාකරු) ​