(මොරගොල්ලාගම - සිසිර කැලේගම)
ප්‍රාදේශීය සභාවට පත් කිරීමට නියමිත සභාපතිවරයකුට එරෙහිව ගෙන ඒමට නියමිත දෝෂාභියෝගයට සහයෝගය ඉල්ලීමට එක්සත් ජාතික පක්ෂයේ මන්ත්‍රීවරයකු සොයා ගිය ශ්‍රී ලංකා පොදුජන පෙරමුණේ මන්ත්‍රීවරයකුට අකරතැබ්බයකට මුහුණ දීමට සිදුවීමේ පුවතක් වයඹ පළාතෙන් වාර්තා විය.

වාර්තා වූ අන්දමට සිද්ධිය මෙසේය.

සිද්ධියට අදාළ ප්‍රාදේශීය සභාවේ වැඩි බලය ශ්‍රී ලංකා පොදුජන පෙරමුණ අත්පත් කරගෙන ඇත. ඒ අනුව එහි සභාපති ධුරය හිටපු සභාපතිවරයාට ලබාදීමට සියල්ල සූදානම් බවට තොරතුරු අනාවරණය විය. එම ධුරය ඔහුට දීමට එරෙහිව කටයුතු කිරීමට එම පක්ෂයේම මන්ත්‍රීවරුන් පිරිසක් මේ දිනවල පක්ෂ විපක්ෂ සාම සාකච්ඡා පවත්වමින් යන බවටත් එයට සහාය දීමට විපක්ෂයේ ඇතැම් මන්ත්‍රීවරුන් ද සැදී පැහැදී සිටින බවටත් තොරතුරු හෙළි විය.

ඒ අනුව එකී වෑයම තව තවත් සාර්ථක කරගැනීම සඳහා එම පක්ෂයේ (පොහොට්ටුවේ) මන්ත්‍රීවරයකු ඉකුත්දා එජාප කාර්යාලයට ගොඩ වී ඇත්තේ එහි සිටි එජාප මන්ත්‍රීවරයාගේ සහයෝගය ද අපේක්ෂාවෙනි. විරුද්ධ පාක්ෂිකයා තම පක්ෂ කාර්යාලයට පැමිධෑම සුහදව පිළිගෙන ඔහු කාර්යාලය තුළ සිටියදී එජාප මන්ත්‍රීවරයා ප්‍රධාන මාවතට පිවිස අසල වෙළෙඳ සල් හිමියන් හා අවට පිරිස් වහා කැඳවා පොහොට්ටුවේ මන්ත්‍රීවරයා තම පක්ෂයේ සාමාජිකත්වය ගැනීම කතා කිරීමට කාර්යාලයට ගොඩ වී ඉන්නා බවට රැස්වූවන්ට ඇසෙන්නට හඬ නගා ඇත. එන පොට වැරදුන බව දැනගත් මන්ත්‍රීවරයා සභාපතිවරයා එළවීමේ සාකච්ඡා පසෙක තබා තමාට එල්ල වෙන ආපදාවලින් මිදෙන්නට පිටුපස දොරෙන් පලාගිය බවට එහි සිටි පිරිස් අප සමග පැවසීය.