අලූතින් විවාපත්වූ තරුණයෙකි. ඔහුට මිතුරකුගේ විවාහෝත්සවයක් සඳහා ඇරයුමක් ලැබිණි. හෝටලයක පැවැත්වූ උත්සවයට තරුණ සැමියා සහ බිරිය සහභාගි වූහ. විවාහ උත්සවයට සංගීතය සැපයුවේ දිවයිනේ ජනප‍්‍රිය සංගීත කණ්ඩායමකි. තරුණ සැමියාද ගීත කිහිපයක් මියුරු හඬින් ගායනා කළ අතර බොහෝදෙනා ඔහුව වර්ණනා කරන්නට වූහ. රුවැති ළඳක්ද සුබ පතමින් ඔහුගේ අතගෙන සෙලවූවාය. මෙය ඔහුගේ බිරියට ඇල්ලූවේ නැත. ඇය බුම්බාගෙන සිටියාය. සංගීත කණ්ඩායමේ නොනවතින ගීතවලට සැවොම නටන්නට වූහ. තරුණ යුවළද රංගනයේ යෙදුණි. එතැනට පැමිණි පෙර පැවසූ කාන්තාවද රංගනයේ යෙදුනාය. සුළු වේලාවකින් ”ඔය ඇති දැන් කන්න යමු” තරුණ බිරිය සැමියාට පැවසුවාය. ඔවුහු ආහාර අනුභව කරන්නට වූහ.


පෙරකී කාන්තාවද ආහාර පිඟාන අතැතිව තරුණ සැමියා පෙනෙන මානයේ වාඩිවූවාය. ඇය වරින් වර ඔහු දෙස බැලූම් හෙලනු දුටු තරුණ බිරිය කෝපාවිෂ්ට වී සැමියාට රවන්නට වූවාය. ආහාර ගැනීමෙන් පසු අතුරුපස බෙදා ගැනීමේදී එතැනට පැමිණි කාන්තාව තරුණ සැමියා අමතා ඩෙසර්ට් එකට මොනාද තියෙන්නේ යැයි විමසුවාය. කාන්තාව තම සැමියා සමග කථා කරනු දුටු භාර්යාව සැමියාව කොනිත්තා ”අර ගෑනි මොනාද කීවේ” යැයි ඇසුවාය. ”ඩෙසට් එකට මොනාද තියෙන්නේ කියලා ඇහුවා?” ඔහු පැවසූ විට ”ඇයි ගෑනිගේ ඇස් පේන්නේ නැද්ද? එනවා යන්න” යැයි බිරිය පැවසුවාය. සැමියා සහ බිරිය මනාල යුවළට සුබපතා පිටත්වූහ.