සිඟමන් ඉල්ලා වෙළඳසලකට ගොඩවැදුණු කාන්තාවන් දෙදෙනකු පසුව එම වෙළෙඳසලෙන්ම ශීතකළ බීම බෝතලයක් සහ වටිනා සුවඳ විලවුන් බෝතලයක් මිලදී ගැනීමේ පුවතක් පසුගියදා සාලියවැව නගරයෙන් වාර්තා විය.
වෙළෙඳසලේ අයිතිකරු කී ආකාරයට මෙම කාන්තාවන් දෙදෙනාගෙන් එක් තැනැත්තියක මැදිවියේ පසුවන බවත් අනිත් තැනැත්තිය තරුණ වයසේ පසුවන බවත් පැවසෙන අතර, මොවුන් දෙදෙනා මව සහ දියණිය විය හැකි බවද පැවසේ.
වෙළෙඳසලට ගොඩවූ මෙම දෙදෙනාගෙන් මැදිවියේ තැනැත්තිය එම වෙළෙඳසලේ අයිතිකරු අමතා තමන්ට ආධාරයක් කරන්නැයි ඉල්ලා ඇත. එහිදී එම කාන්තාවන් දෙදෙනාගේ හැසිරීම් රටාව ගැන විමසිලිමත්වූ වෙළෙඳසල් හිමියා ඔවුන්ට ආධාර දීම ප‍්‍රතික්ෂේප කොට ඇත. ඒ සමඟ මද වේලාවක් ඒ මේ අත බැලූ කාන්තාව ”එහෙනම් මුදලාලි අපිට කූල් බීම බෝතලයකුයි අර සෝකේස් එකේ තියෙන සෙන්ට් බෝතලයයි දෙන්න” යැයි කියා රුපියල් පන්සියයක මුදල් නෝට්ටුවක් දික්කර ඇත.
ඒ අනුව ක‍්‍රියාත්මක වූ මුදලාලි රුපියල් තුන්සිය ගණනක් වටිනා එකී සුවඳ විලවුන් බෝතලයත්, ශීතකළ බීම බෝතලයත් කාන්තාවට දී ඊට ඇය ලබාදුන් රුපියල් පන්සියයේ නෝට්ටුවෙන් නියමිත ගාස්තුව ලබාගෙන ඇත.