තමන් සේවය කරන හෝටලයට නුදුරින් පිහිටා තිබූ රෝහල කරා ඔහු පැකිළෙන දෙපයින් පියවර මැන්නේ අසනීපයකට ප‍්‍රතිකාර ගැනීමට නොව බීමතිනි.
රෝහල් භූමි පරිශ‍්‍රයට පිවිසි ඔහු පසෙක නතර කෙරුණු මෝටර් රියක් අසලට ගියේ එහි රියැදුරු අසුන පැත්තෙන් දොර හැර දොස්තර නළාව ද කර හොවාගත් වෛද්‍යවරිය කෙරෙහි සිතක් පහළ වූ බැවිනි.
ඔහුගේ බැල්ම වෛද්‍යවරියට රිස්සුවේ නැත. බීමත්ව සිටි ඔහුට වෛද්‍යවරියගේ නොරිස්සුම තේරුම් ගැනීමට නොහැකිවිය. මං ඔයාට ආදරෙයි. ඔහු තෙපලූයේ බමන මතිනි. රෝහල් ආරක්‍ෂක අංශයේ සී.සී.ටී.වී කැමරාවක් තිබිණි. ආරක්‍ෂක අංශය භාරයට ගැනුණු බීමත් පෙම්වතා රෝහල් පොලිසිය වෙත බාර දෙනු ලැබිණි.
කුලියාපිටිය පොලිසිය මගින්, කුලියාපිටිය මහේස්ත‍්‍රාත් අධිකරණය වෙත ඔහු ඉදිරිපත් කෙරුණේ, ප‍්‍රසිද්ධ ස්ථානයක බීමත්ව අශෝභන ලෙස හැසිරුනේය යන චෝදනාව මතය.
චෝදනාව සඳහා වරද පිළිගත් ඔහුට, කුලියාපිටිය මහේස්ත‍්‍රාත් බන්ධුල ගුණරත්න මහතා රුපියල් 3500ක දඩ මුදලක් නියම කළේය.