(මීරිගම පුෂ්පකුමාර මල්ලවආරච්චි)
මෝටර් රියක ගැටී තුවාල වූ වල් ඌරකු කාකි ඇඳි පිරිසකගේ ප්‍රහාරයකට ලක්ව මරු දැකීමෙන් පසු ත්‍රීරෝද රියක පටවාගෙන ගිය පුවතක් වයඹ පළාතේ ගසක් හා ගැටයක් සහිත ගම්මානයකින් ඇඳිරි නීතිය මැද්දේ පසුගියදා වාර්තා විය. 


ඇඳිරි නීතිය  ක්‍රියාත්මකව පැවැති රාත්‍රී කාලයකි. මහමග දෙසින් ශබ්දයක් ඇසුණු ගම්වැසියකු ඒ දෙස නෙත්  යොමා බැලුවේ කුමක් සිදුවීද යන්නයි. 


නවීන පන්නයේ මෝටර් රියක් වේගයෙන් ඉදිරියට ඇදී යන අයුරුත් තුවාල  ලැබූ වල් ඌරකු පාර අයිනේ වැටී දඟලමින් සිටින අයුරුත් ගම්වැසියාට දක්නට ලැබිණි. 


ජීවිතයත් මරණයත් අතර පොර බදන වල් ඌරාගේ පණ බේරිය හැකිදැයි බලන්න අසල්වැසියකු එද්දී තවත් මෝටර් රියක් වැටී සිටි වල් ඌරා අසල නවතනු දක්නට ලැබිණි. 


පිත්තල බොත්තම් සහිල නිල ඇඳුමෙන් සැරසුණු පුද්ගලයන් කීප දෙනකු සමග සිවිල් ඇඳුමින් එක් අයකු ද ඒ අතර සිටින බව ඔහු දැක්කේය. වල් ඌරාට දිය බිඳක් ඉසින්නට යාමෙන් ඇඳිරි නීතිය කඩ කළැයි යන චෝදනාවට ලක්වීමට ඉඩ තිබූ නිසා ගම්වැසියා ඈතට වී බලා සිටියේ කුමක් සිදුවේද යන්නයි. වට පිට ඇවිද පොල්ලක් සොයා ගත් පිත්තල බොත්තම්කාරයකු වල් ඌරාට තඩිබාන බව ඔහු දුටුවේ ඒ අතරය. 


පිරිසේ සිටි කෙනකු අසල්වැසියකුට කතා කර පොරවක් හෝ මෝල් ගහක් ඉල්ලනවාද ඔහුට ඇසුණි. ඊට ලැබුණු ප්‍රතිචාරය යහපත් නොවූයෙන් පිරිස ඔවුන් සොයාගත් මුගුරෙන් වල් ඌරා සදහටම නිහඬ කරන්නට සෑහෙන වෙලාවක් ගත්තේය. 


අනතුරුව වල් ඌරා මෝටර් රියට නංවා ගැනීමට ගත් උත්සාහය අසාර්ථක වීමෙන් පසු ගෙන්වා ගත් ත්‍රිරෝද රියක පටවා ආපසු ගෙන ගියේ සිත් සේ බුදිනු පිණිස විය යුතුය.