ඇය පාසල් ගමනට ආයුබෝවන් කියා හා හා පුරා කියා රැකියාවකට ගියේ නොබෝදාය. ඇගේ පළමු රැකියාව වූයේ වෙළෙඳ සහයිකා තනතුරකි. සුවිසල් වෙළෙඳසැලේ වැඩට යනවිට ඇයට වයස අවුරුදු දහඅටයි මාස දෙකකි. එහි සේවය කරමින් සිටියදී කඩවසම් තරුණයකු එහි වැඩට ආවේ ඔය අතරය.

දින සති බවට පෙරළී යද්දී දහඅට හැවිරිදි මේ සුරූපිනිය හා අලුතින් වැඩට පැමිණි කඩවසම් තරුණයා අතර ඇති වූ මිතුදම ප්‍රේමයක් බවට පෙරළී ගියේ දෙදෙනාටම නොදැනය.

“මට ඔයාව නිතරම මතක් වෙනවා.” ඇය ඔහුට කීවාය. 

“මටත් එහෙමයි” ඔහු ඇයට කීවේ ප්‍රේම දැලේ පැටළී සිටින මොහොතකය.

“අපේ අම්මලා මේකට කැමති වෙන එකක් නෑ” ඔහු කීවේ යම් දෙයක් සඟවමිනි.

“බෑ බෑ මට දැන් ඔයා නැතුව බෑ. මාව කොහේ හරි එක්කගෙන යන්න. සම්බෝලයි බතුයි කාලා හරි ජීවත් වෙමු.”

ඇයගෙන් ඔහුට බේරීයාමට නොහැකි විය.

ගෙදරටත් හොරා තරුණයා තරුණිය එක්ක පැනගියේ ඔය අතරය. තරුණයාගේ මව යක්කලමුල්ල පොලිසියට පැමිණිල්ලක් කළේ ඊට පසුවය. පැනගිය දෙදෙනා පොලිසියට කැඳවීමට යක්කලමුල්ල පොලිස් ස්ථානාධිපති සුමිත් පෙරේරා කටයුතු කළේය.

“මම මෙයාට ආදරෙයි සර්. අම්ම කියන දේ ඇත්ත සර්. මට තාම අවුරුදු දහසයයි” තරුණයා කී දේ ඇසුණු තරුණියට හීන් දාඩිය දමන්නට විය.

“තව අවුරුදු දෙකක් යනකම් මට බඳින්න බෑ. සමාවෙන්න” කියා තරුණයත් තරුණියත් පොලිස් පොතේ අත්සන් කොට වෙන්ව ගියේ හදිසියට කොරහෙවත් අතදමා ගන්නට බැරි බව අවබෝධ කරගනිමිනි. 

(යක්කලමුල්ල විශේෂ - ජේ.කේ.එල්. චාමින්ද)