(තණමල්විල - සුජීව ජයවික‍්‍රම)
පළාත් ඡුන්දය පැවැත්වෙන ඌව පළාතේ බොහෝ ඡුන්ද දායකයෝ අලූත්ම කලාවකට පුරුදු වී සිටිති. එනම් එදිනෙදා ජීවිතයේදී අවශ්‍ය වන කටයුතු සඳහා දේශපාලකයන්ගේ සහයෝගය ලබාගැනීමට නොහොත් දේශපාලකයාගේ දත ගැලවීමටය. එවැනි එක් සිද්ධියක් තණමල්විල ප‍්‍රදේශයෙන් ද සැල විය.


මෙම පුද්ගලයාගේ නිවෙසට පැමිණි අපේක්ෂකයකුගේ පිරිසකට සිය දුක් ගැනවිල්ල වූ ස්ථීර වැසිකිළියක් නොමැති බව කී පසු ඒ සඳහා මුදලක් ද අධ්‍යාපනය ලබන දරුවන්ට පොත්පත් ගැනීමට තවත් රුපියල් 4000/-ක් ද ඊට අමතරව පෝස්ටර් මිටියක්ද දුන්නේ ප‍්‍රචාරක කාර්යාලයක් පවත්වාගෙන යාමටය.

පසුදා එම පොස්ටර් අලවා කාර්යාලයක් හැදුවේය. එහෙත් එය තිබුණේ දින තුනකි. ඊට පසු එම කාර්යාලයේ තිබුණේ එම පක්ෂයේම වෙනත් අපේක්ෂකයකුගේ ඡයාරූපයකි.


මේ ගැන විමසූ කල ඔහු මෙසේ කීවේය.
”මේ පෝස්ටර් ටික ගහගෙන ඉද්දී වෙන අපේක්ෂකයෙක් කීව අපි මෙච්චර මුදලක් දෙන්නම් කියලා. ඉතිං ඒ සල්ලි අරගෙන අර පෝස්ටර් ගලවල මේව ගැහුව. ඉතිං හෙට අනිත් පක්ෂයෙ කෙනෙක් මෙහෙම ආවොත් මම එයාලගෙ පෝස්ටරුත් ගහනවා.” ඔහු එසේ කීවේ මහ හයියෙන් සිනාසෙමිනි.