වෙළෙඳසලකින් වැඩි මිලට ගත් කුකුළු මස් පාර්සලයක් ශීතකරණයේ දමා තිබිය දී එතුළින් කුකුළකු හඬලනු ඇසීමෙන් බියට පත් ගෘහ සේවිකාවක් පිළිබඳ පුවතක් අසන්නට ලැබුණේ කළුතර ප‍්‍රදේශයෙනි. ගෙදරට කුකුළු මස් ගෙනාවේ පසුදා පැවැත්වෙන සාදයක් සඳහා පොඩි පුතා විසිනි. ඒවා ශීතකරණයේ දමා ගෙදර වැඩකරන සේවිකාවට ඒ බව කියා ඔහු කාමරයට ගියේය. මොහොතකට පසු ශීතකරණයෙන් කුකුළකු හඬලන්නට විය. ගෘහ සේවිකාව දුවගෙන ගොස් ගෙදර නෝනාට මේ බව කීවේ බියෙන් ගැහෙමිනි. එතැනට ආ ඇයට ද පැහැදිලිව කුකුළු හඬ ඇසිණ. ඇය ශීතකරණයේ දොර ඇරියේ බියෙනි. ඒ සමගම කුකුළු හඬ නැවතිණ. ඇය පසුපසම දිව ආ පොඩි පුතා කීවේ අපූරු කතාවකි. ”මට මතක නැතුව මස් පාර්සලයත් එක්ක මගේ හෑන්ඞ් ෆෝන් එකත් ෆ‍්‍රිජ් එකේ තියලා. හැම තැනම හොයලා නැති තැන රිං එකක් එව්වා. ඒකෙ තියෙන්නේ කුකුළා හඬන සද්දෙනේ” කී ඔහු ශීතකරණයට එබී කුකුළු මස් පාර්සලය ළඟ තිබූ ජංගම දුරකථනය රැගෙන ගියේ තවමත් කට ඇරගෙන බියවී සිටින සේවිකාවටත් අම්මාටත් ඔච්චම් කරමින්ලූ.