(මෝදර - සී. ඉග්නේෂස් ඇන්තනි)
සොරකමක් කළා කියා නොදැනුවත්ව ගුටිබැට දුන් පුද්ගලයෙකුගෙන් සිදු වූ දෙය නිවැරදිව වටහාගත් පසු පොලිස් නිලධාරීන් සහ ගම්වාසීන් සැකකරුගෙන් සමාව ගත් පුවතක් කොළඹට නුදුරු ප්‍රදේශයකින් වාර්තා විය.


එම පුවත මෙසේය.


සැකකරු ගැමි පුද්ගලයෙකි. ඔහු රස්සාව කරන්නේ කොළඹ ප්‍රදේශයේය. මෙය සිදුවූයේ සවස් කාලයේ දුම්රිය ස්ථානයකට යාබඳවය.


මුදල් පසුම්බියක් අරං ගියා කියා නිවාස පේළියක කාන්තාවක් කෑගසන්නට වූවාය. අහල පහළින් සෙනඟ රැස්වූහ. සංචාරය කරමින් සිටි පොලිස් නිලධාරීහු කිහිප දෙනෙක්ද එතැනට ආහ.
පර්ස් එක අරං ගියා යැයි කියන පුද්ගලයා සොයමින් ගම පීරුවත් පිරිසට සැකකරු අල්ලා ගැනීමට නොහැකි විය.


එහෙත් ඈතින් දුවන කෙනෙකු දැක ගම්වාසීහු ඔහු අල්ලා කට බැඳ හොඳටම ගුටිබැට දී පොලිසියට බාර දුන්හ. ඔහුට කතා කරන්නවත් ඉඩක් නොලැබුණි.


පොලිසිය ඔහුගෙන් ප්‍රශ්න කළේය. අනේ සර් මේ වගේ දෙයක් මේ පැත්තේ වුණාද කියාවත් මා දන්නේ නෑ. වැඩ ඇරිලා සවස 6ට තිබෙන කෝච්චිය අල්ලන්නයි මා මේ දුවන්නේ. මම හැමදාම සවසට මේ හරියෙන් කෝච්චිය අල්ලන්න වුවමනා නිසා දුවනවා. ඒ වෙලාවේ තමයි මේ අය මාව අල්ලා කට බැඳලා ගැහැව්වේ.


මට මේ අය කතා කරන්නවත් ඉඩ දුන්නේ නෑ. අනේ සර් මම හොරෙක් නෙමෙයි. මගේ ගෙදර අය මා එනකම් බලාගෙන ඉන්නවා ඇති මට යන්න දෙන්න සර්.


මා දුවන නිසයි මොවුන් මා අල්ල ගත්තේ යැයි ඔහු පැවසීය.


පොලිසියට කරුණු වටහුණි. ඉන්පසු සැවොම ඔහුගෙන් සමාව ගත්හ. ටික වේලාවක් ගතවිය. ඔහුට යන්නට තිබෙන දුම්රිය ඒ අසලින් ගියේය. කමක් නැහැ ඊළඟ කොච්චිය අල්ලන්නවත් මම යන්නම් කියා ඔහු පිරිසගෙන් වෙන්වී ගියේ ඉතාම වේදනාවකිනි.