මේ පිළිබඳව අප කළ විමසුමකදී අදහස් දැක්වූ ආරක්ෂක අංශ ජ්යෙෂ්ඨ නිලධාරියකු පැවසුවේ එම පිපිරීම් සම්බන්ධයෙන් ශ්රී ලංකාව ද අවධානයෙන් පසුවන බවයි.
විශේෂයෙන්ම රජයේ බුද්ධි සේවා මේ සම්බන්ධයෙන් නිරන්තර අවධානයකින් පසුවන බව ද හෙතෙම සඳහන් කළේය. එම සිද්ධීන් හා සබැඳි බුද්ධි අංශ වාර්තා පරිශීලනය කරමින් රජයට තොරතුරු දැනුම් දීමට වෙනම බුද්ධි අංශ කණ්ඩායම් ද යොමු කරනු ලැබ ඇතැයි වාර්තාවේ.
ඉන්දියාවේ හදවත බඳු ඓතිහාසික රතු බලකොටුව අසල ඉකුත් 10 වැනිදා සිදුවූ මෝටර් රථ බෝම්බ පිපිරීමෙන් නව දෙනකු ජීවිතක්ෂයට පත්වී විසි දෙනකුට අධික පිරිසක් බරපතළ තුවාල ලැබූහ.
සිද්ධිය සම්බන්ධයෙන් අදහස් දක්වන ඉන්දීය විමර්ශකයන් පවසන්නේ මෙය ඉහළ උගත් වෘත්තිකයන් විසින් මෙහෙයවනු ලබන “සුදු කරපටි ත්රස්තවාදයේ” නව මුහුණුවරක් බවයි.
මේ අතර පාකිස්ථානයේ ඉස්ලාමාබාද් අගනුවර අධිකරණ ගොඩනැගිල්ලක් අසල පසුගිය 11 වැනිදා සිදුවූ බෝම්බ පිපුරුමෙන් නව දෙනකු මිය ගොස් 21 දෙනකු බරපතළ තුවාල ලබා ඇති බව පාකිස්ථාන මාධ්ය වාර්තා කළේය.
