දකුණු පළාතේ උප නගරයකට ආසන්නව පැවැති බක්මහ සැණකෙළියක කඹ ඇදීමේ තරගයකි. උත්සවයේ ආරාධිතයකු වූ පොලිස් ස්ථානාධිපතිවරයා තරගය නැරඹීමට ඒ අසලට යත්ම සංවිධායකවරයා තරගකරුවන් හඳුන්වා දීමට සූදානම් විය.

එක් කණ්ඩායමක වූ තරගකරුවන් අටදෙනා හඳුන්වා දීමෙන් පසු අනෙක් කණ්ඩායමේ වූ තරගකරුවන් හඳුන්වා දීමේදී එහි හත්දෙනකු පමණක් සිටීම නිසා ඔහු කලබලයට පත්විය.

කරුණු සෙවීමේදී අනාවරණය වූයේ ඉතිරි තරගකරුවා පොලිසිය සොයමින් සිටින වරෙන්තුකරුවකු නිසා ඔහු හෙමිහිට එතැනින් ලිස්සා ගොස් ඇති බවය. වහා වෙනත් තරුණයකු ඉදිරිපත් වී තරගය පැවැත්වුවත්, පොලිස් ස්ථානාධිපතිවරයා එතැනින් ඉවත්ව යන තුරුම ඔහුගේ උකුසු ඇස යොමුවී තිබුණේ රැස්ව සිටි තරුණ පිරිස දෙසටලූ.