(රුවන් පතිරණ, ජයරත්න විල්ලර)

විවාහක බිරිය සැමියාගේ මළ සිරුර බාර ගැනීමට අකමැති වූ නිසා අසනීප තත්ත්වයෙන් සිටියදී ඔහු රෝහලට බාර දුන් පුද්ගලයාටම මළ සිරුර බාර ගැනීමට සිදු වූ පුවතක් වරකාපොළ පොලිසියෙන් වාර්තා වෙයි.

මෙසේ මිය ගොස් ඇත්තේ ගංගොඩවිල ආරච්චිලාගේ ශාන්ත කුමාර (58) නමැති පුද්ගලයකු බවට පොලිසිය විසින් අනාවරණය කරගෙන ඇත.

වරකාපොළ නගරයේ පාවහන් අලූත්වැඩියා කිරීම මොහු රැකියාව වශයෙන් කරගෙන ගොස් ඇති අතර පසුගිය දින කිහිපයක් තිස්සේ අසනීප තත්ත්වයෙන් වරකාපොළ ශ‍්‍රී ලංගම බස් නැවතුම්පළෙහි ලැගුම් ගෙන සිටියද කිසිවකුත් ඔහුට උදව් කිරීමට ඉදිරිපත් වී නොමැත.

එම ස්ථානයෙන් ගමන් කරමින් සිටි වරකාපොළ ප‍්‍රාදේශීය සභාවේ සුළු සේවකයෙකු වන මූකන් අලගිරි ගුනාලන් යන අයෙකු විසින් මොහු වරකාපොළ මූලික රෝහලට ඇතුළත් කර ඇත. ඊට දින කිහිපයකට පසු ශාන්ත කුමාර යන අය මියගොස් ඇති නමුත් මෘත ශරීරය බාර ගැනීමට කවුරුන් හෝ ඉදිරිපත් නොවීම හේතුවෙන් මොහුගේ ඥාතීන් සොයා යාමට වරකාපොළ පොලිසියේ පොලිස් සැරයන් (17170) ජයසේන මහතාට සිදුවිය.

දින කිහිපයකට පසු මිය ගිය අයගේ බිරිය වේයන්ගොඩ බාදුරාගොඩ ප‍්‍රදේශයේ සිටියදී සොයා ගැනීමට හැකිවී ඇති අතර වරකාපොළ රෝහලේදී මියගිය අය තමාගේ සැමියා බවට ඇය හඳුනා ගත්තද ඇය විසින් පොලිසියට පවසා ඇත්තේ මෘත ශරීරය ඇයට භාර ගැනීමට නොහැකි බවයි.

 පසුව මියගිය අය රෝහල වෙත භාරදුන් ගුනාලන් යන අය මෘත ශරීරය භාරගෙන ඔහුගේ වියදමින් වරකාපොළ අඹේපුස්ස පොදු සුසාන භූමියේදී අවසන් කටයුතු සිදුකර තිබිණ.

වරකාපොළ පොලිස් ස්ථානාධිපති එච්.එච්. ජනකාන්ත මහතාගේ උපදෙස් මත පොලිස් සැරයන් (17170) ජයසේන මහතා පරීක්ෂණ  පැවැත් විය.