(මුදිතා දයානන්ද)
 
පීඩාවටත් අසරණභාවයටත් පත් ජනතාව වෙනුවෙන් කරන අරගලය පාර්ලිමේන්තුවෙන් පිටත සිට හෝ ඉටු කරන්නට සුදානම් යැයි ජාතික ජනබලවේගයේ නායක හිටපු පාර්ලිමේන්තු මන්ත්‍රී අනුර කුමාර දිසානායක මහතා අද(07) පැවසීය.
 
ඔහු මේ බව පැවසූයේ පැලවත්තේ පිහිටි ජනතා විමුක්ති පෙරමුණේ ප්‍රධාන කාර්යාලයේදී පැවති ජාතික ජනබලවේගයේ මාධ්‍ය හමුවකදීය.
 
මහමැතිවරණ ප්‍රතිඵල ලෙස නිකුත් වුයේ ජනතාව පෙට්ටියට දැමු ඡන්ද මිස වෙන යමක් නොවන බවට තමන් විශ්වාස කරන බවද පෙට්ටි මාරු කිරීමක් හෝ වෙනත් ජිල්මාට් එකක් ගැන හෝ කියන්න තරම් තත්ත්වයකට තමන් පත් නොවන බවද ඔහු පැවසීය. ඒ අනුව තම දේශපාලන ව්‍යාපාරය කෙරෙහි වන ජනතා කැමැත්ත මෙය බව පිළිගන්නා බවද ඔහු පැවසීය.
 
විපක්ෂයේ කාර්යභාරය ඉටු කළ හැක්කේ පාර්ලිමේන්තුව තුළ පමණක් නොවන බවද ඉන්පිටත සිට විපක්ෂයේ කාර්යභාරය වඩාත් හොඳින් ඉටුකිරිමේ හැකියාව ඇති බවද ඒ අනුව තම වගකීම හා යුතුකම ජනතාව වෙනුවෙන් ඉටුකරන බවද ඔහු පැවසීය.
 
මැතිවරණ ප්‍රතිඵලය දෙස බලා තම දේශපාලන ව්‍යපාරයේ කාර්යභාරය අකුළා නොගන්නා අතර ජනතා අවශ්‍යතා ඉටුකර ගැනීම සඳහා ගොවි ජනතාව, කම්කරු ජනතාව, රැකියා විරහිත තරුණ ප්‍රජාව සමග එක්ව තවදුරටත්  අරගලය ඉදිරියට ගෙන යන බවද ඔහු පැවසීය. 
 
(ඡායාරූප - ගයාන් අමරසේකර)