(පැතුම් දර්ශන)

හොරොව්පොතාන කිරලාගල ඉපැරණි පුරාවිද්‍යා භූමියට අනවසරයෙන් ඇතුළු වී චෛත්‍යක් මතට නැග ඡායාරූප ගෙන සමාජ ජාල වෙබ් අඩවිවලට මුදා හළ තරුණයන් 8 දෙනෙකු අම්පාර සහ අක්කරෙයිපත්තු ප්‍රදේශයේදී අද (23) සවස අත්අඩංගුවට ගත් බව  හොරොව්පොතාන පොලිසිය කියයි.

මෙලෙස අත්අඩංගුවට ගෙන ඇත්තේ අම්පාර ඔලුවිල් අග්නිදිග විශ්ව විද්‍යාලයේ ඉංජිනේරු පීඨයේ අවසන් වසරේ ඉගෙනුම ලබමින් සිටි සිසුන් 8 දෙනෙකුය.ඔවුන් කල්මුණේ, ගම්පොල ,කුලියාපිටිය, හොරොව්පොතාන, පුත්තලම, එරාවුර්, ඔට්ටමාවඩිව් යන ප්‍රදේශවල පදිංචිකරුවන් ය.

පුරාවිද්‍යා දෙපාර්තමේන්තුවට අයත් හොරොව්පොතාන කිරලාගල පිහිටි ඉපැරැණි නටඹුන් සහිත පුරාවිද්‍යා භූමියට අනවසරයෙන් ඇතුළු වී චෛත්‍යය මතට නැග තරුණයන් දෙදෙනකු විසින් ඡායාරූප ගෙන සමාජ ජාල වෙබ් අඩවි වලට මුදා හැර ඇති බවත් ඒ සම්බන්ධයෙන් පරීක්ෂණයක් පවත්වන ලෙසත් ඉල්ලා කිරලාගල කලාප භාර පුරාවිද්‍යා නිලධාරි සුමිත් බංඩාර රත්නායක මහතා විසින් ඊයේ (22) සවස හොරොව්පොතාන පොලිසියට පැමිණිලි කර තිබුණි.

ඒ අනුව ක්‍රියාත්මක වූ හොරොව්පොතාන පොලිසියේ ස්ථානාධිපති පොලිස් පරීක්ෂක රොෂාන් සංජීව මහතා එම පැමිණිල්ලට අදාළ මූලික පරීක්ෂණ ආරම්භ කළ අතර එහිදී අනාවරණය කර ගැනීමට හැකි වූයේ මෙම සිද්ධියට සැකකරුවන් 8 දෙනෙකු සම්බන්ධ බවත් ඔවුන් අම්පාර ඔලුවිල් අග්නිදිග විශ්වවිද්‍යාලයේ ඉංජිනේරු පීඨයේ අවසන් වසරේ ඉගෙනුම ලබන බවත්ය.

එයින් එක් සැකකරුවෙකු හොරොව්පොතාන ප්‍රදේශයේ වන අතර අනෙක් සැකකරුවන් හත් දෙනා දිවයින විවිධ ප්‍රදේශවල පදිංචිකරුවන් බවත් පොලිසිය වැඩිදුරටත් අනාවරණය කරගෙන තිබුණි.

ඒ අනුව ලබාගත් තොරතුරු අනුව හොරොව්පොතාන පොලිසියේ අපරාධ විමර්ශන අංශයේ ස්ථානාධිපති උප පොලිස් පරීක්ෂක ගාමිණි ජයවර්ධන මහතා ඇතුළු විශේෂ පොලිස් කණ්ඩායමක් සැකකරුවන් සොයා  අද (23) අම්පාර සහ අක්කරෙයිපත්තුව ප්‍රදේශයට ගොස් තිබේ.එහිදී සිදුකල දීර්ඝ සෝදිසියකදී මෙම සැකකරුවන් අත්අඩංගුවට ගැනීමට හැකි වූ බව පරීක්ෂණ පවත්වන පොලිසිය වැඩිදුරටත් කියයි.

2018.01.05 වන දින හෝ ඊට ආසන්න දිනකදී හොරොව්පතාන ප්‍රදේශයේ සිටින යහළුවාගේ නිවසට පැමිණි තමන් කිරලාගල පුරාවිද්‍යා භූමියේ ද  සංචාරය කළ බවත් එහිදී චෛත්‍ය මතට නැග ඡායාරූප ගත් බවත් සැකකරුවන් පොලිසියට පවසා තිබේ. එම අවස්ථාවේදී එය එතරම් බැරෑරුම් කාර්යයක් බව නොතේරුණු බවත් එසේ දැනුණේ නම් මෙලෙස ඡායාරූප ගෙන සමාජ ජාල වෙබ් අඩවි වලට මුදා නොහරින බවත් සැකකරුවන් වැඩිදුරටත් පවසා තිබේ.

අත්අඩංගුවට ගත් සැකකරුවන්ට හෙට (24) කැබිතිගොල්ලෑව මහේස්ත්‍රාත් අධිකරණයට ඉදිරිපත් කිරීමට නියමිතය.