(කලවාන - උපේන්ද්‍ර ප්‍රියංකර ජාතුංගම)
රිය අනතුරු සම්බන්ධයෙන් පොලිසියට හිසරදයක් වූ පුද්ගලයකු දුන් උත්තරයකින් පොලිසිය හොල්මන් වූ පුවතක් නගරබඳ ප්‍රදේශයකින් වාර්තා විය.


ඔහුගේ අතින් නිතරම පාහේ රිය අනතුරු සිදුවෙයි. මෙම අනතුරු බොහෝමයක් සිදුවී ඇත්තේ බීමතින් යතුරුපැදියේ ගමන් ගනිද්දීය. ඒ මිතුරන් සමඟ සාද පවත්වා යනවිටය. එක්කෝ යතුරුපැදිය ලයිට් කණුවක, ගසක, තාප්පයක ගැටෙන අතර එසේ නැත්නම් බොක්කුවක් තුළට ඇද වැටී අනතුරට ලක්වූ අවස්ථා ඇත.


සිද්ධිය වූ දිනයේ ද ඔහු බීමතින් යතුරුපැදියෙන් ගොස් ඇති අතර යතුරුපැදිය ගසක ගැටී අනතුරට ලක්ව තිබේ. අනතුරින් යතුරුපැදියට දැඩි අලාභහානි සිදු වී ඇති අතර ඔහු ද තුවාල ලබා රෝහල් ගත කර ඇත.


පසුව ඔහුව පොලිසියට කැඳවා ඇති අතර පොලිසියේ නිලධාරියකු ඔහු අමතා පවසා ඇත්තේ ‘මල්ලී බයික් එකනම් ලේසියෙන් හදන්න බැරි වෙයි කියාය’ යාන්තම් ඇති කරදරයක් නතර වුණා යැයි නිලධාරියා තමන්ටම මුමුණා ගන්නා අතරතුර නිලධාරියා ඇමතූ යතුරුපැදිකරු ‘අවුලක් නෑ සර්. මම ගිය සතියේ ත්‍රිවිල් එකක් ගත්තා යැයි’ පවසා ඇත.


ඔළුවේ අත ගසා ගත් නිලධාරියා ‘බයික් එකෙන් මෙහෙම නම් ත්‍රිවිල් එකෙන් මොනවා වේවිදැයි’ පවසමින් අනතුර සම්බන්ධයෙන් සටහන් තැබීම ආරම්භ කර තිබේ.