මධ්‍යම රාත්‍රියේ මුහුණු පොත පුරා සැරිසරමින් සිටි කාන්තාවකගේ දුරකතනය නිසා ඇයගේ සිඟිති දරුවාගේ ජීවිතයට වෙන්න ගිය විපතක් තම නැන්දම්මාගේ අවධානයෙන් වැළකී ගිය පුවතක් වයඹ පළාතෙන් වාර්තා වේ.


ඇය සෙල්ලක්කාර ජීවිතයක් ගත කළ රූමත් තරුණියකි. නිතරම මුහුණු පොතේ සැරිසරමින් කාලය ගත කරන්නීය. බස් එකේ ගියත්, දුම්රියේ ගියත් මේ පුරුද්ද අතහැරියේම නැත.


ඇයගේ මේ හැසිරීම් නිසා කාර්යාලයේ ලොක්කන්ගෙන් බැණුම් අහපු වාර අනන්තය. කාලයක් ගිය පසු මුහුණු පොතේ සැරිසැරූ තරුණයකු සමග හාද වී විවාහ විය. මේ තරුණයා ආරක්ෂක අංශයක සේවය කළේය. ඔහු ද ඇයගේ මේ දුරකතනයේ එල්ලී සිටීමේ පුරුද්දට අවවාද කර තිබුණි. මෙසේ කාලයක් ගත වන විට ඇය සිඟිති දියණියකගේ මවක් වූවාය. ඇයගෙත් දරුවාගෙත් සියලුම කටයුතුවලට නැන්දම්මා හරියට උදව් කළාය. මේ ලැබුණු නිදහස තුළින් ඇය කාලය ගත කළේ මුහුණු පොතේ සැරිසැරීමටය. 


එහෙත් නැන්දම්මා “දුවේ මේ දරුවා බලාගෙන ඉන්න ඔය දුරකතනය පැත්තකට දාලා” යනුවෙන් නිතරම ඇයට අවවාද කරන්නීය.


නැන්දම්මා කොතරම් අවවාද කළත් වැඩක් නැත.  ඒනිසා ඇය දරුවා ගැන ඇස ගසාගෙන සිටියාය. දිනපතාම දෙදෙනා නින්දට යනතුරු අවධානයෙන් සිටියාය.


පසුගිය දිනක මධ්‍යම රාත්‍රියේ අවදි වූ නැන්දම්මා ලේලිය නිදා සිටි කාමරය දෙසට සෝදිසියෙන් පියමැන ඇත්තේ පුතා ද එනතුරු සිටින නිසාය. දෙදෙනා දෙස ළංවී බලන විට ඇය දැක ඇත්තේ මිනිපිරියගේ මුහුණ අසලින් එළියක් විහිදෙන බවයි. පසුව සෝදිසි කර බලන විට දැක ඇත්තේ එය ජංගම දුරකතනයක් බවයි. ඇයට දෙවියෝ සිහිවිය. තමා නාව නම් දුරකතනය මිනිපිරියගේ මුහුණට සිරවී ඇයට කරදරයක් වීමට ඉඩ තිබූ බව ඇයට වැටහුණි. ඇය දුරකතනය රැගෙන ලේලිය අවදි කළාය.


හීනෙන් මෙන් අවදි වූ ලේලිය දුරකතනය සොයන්නට වූවාය. මේ විකාර රංගනය දුටු නැද්දම්මාට යකා නැග එය පොළොවේ ගසා මහ හයියෙන් ලේලියට බැණවැදුණාය. ඉකිබිඳීම් මධ්‍යයේ ලේලියට මැවී පෙනුණේ සැමියාගේ තරහ ගිය මුහුණයි.


තමාගේ මේ ඉවක් බවක් නැති මුහුණු පොතේ සැරිසැරිල්ල නිසා තම දියණියගේ ජීවිතයට හානියක් නොවී බේරාදීම ගැන වැඳ වැටෙමින් පිං දී ඇත්තේ තම නැන්දම්මාටය.
බන්දුල පතිරණ