නැගෙනහිර අප්‍රිකාවේ උතුරු කොටසට අයත් එරිට්‍රියා රාජ්‍යයේ ආගමික නායකයින්ගේ නිර්දේශයක් අනුව තරුණ පිරිමින්ට විවාහ දෙකක් කරගැනීම අනිවාර්ය කළ බවට පැතිරී ඇති කතාවේ කිසිදු සත්‍ය තාවයක් නැති බව එරට බලධාරීහු පවසති. 

එරිට්‍රියාවේ මාධ්‍ය ඇමැති යෙමනේ ගෙබ්රෙමෙස්කෙල් පවසා ඇත්තේ "මෙවන් අසත්‍ය තොරතුරක් ලොව වටා ලැව් ගින්නක් ලෙස පැතිරී ඇති අන්දම බියජනක" බවය.

මෙම ප්‍රවෘත්තිය කෙන්යාවේ  " ද ක්‍රේසි මන්ඩේ" සහ  නයිජීරියාවේ " ද විස්ලර්" වැනි මාධ්‍ය ආයතනවලින් ප්‍රසිද්ධ කර තිබුණි.

එයින් කියවුනේ 1998 - 2000 අතර කාලයේදී ඉතියෝපියාව සමග පැවැති සිවිල් යුද්ධයේදී තරුණ එරිත්‍රියානු සොල්දාදුවන් 150,000 කට වැඩි පිරිසක් මිය ගිය බැවින් රටේ තරුණ පිරිමින්ගේ විශාල අඩුවක් ඇති බවත් මෙම ගැටලුව නිරාකරණය කරගැනීම සඳහා "විවාහ දෙකක් සිදු කර ගන්නා පිරිමින් වෙනුවෙන් විවාහ මංගලෝත්සවය සඳහා යන වියදම රජය විසින් දරනු ලබන බවත් ඔවුන්ට නිවාස පහසුකම් ලබාදෙන බවත්" එරිත්‍රියා රජය සහතික වී ඇති බවය.

එලෙසම " කාන්තාවන් දෙදෙනකු විවාහ කර ගැනීම ප්‍රතික්ෂේප කරන පිරිමින්ටත් විවාහක බිරිඳ විසින් තම ස්වාමි පුරුෂයාහට තවත් විවාහයක් කරගැනීමට ඉඩ නොදී එයට බාධා කිරීම හෝ එම විවාහය සිදුවීම වැළැක්වීමට කටයුතු කිරීමට විරුද්ධව නඩු පවරන බවත් වැරදිකරුවන් වන්නන්ට ජීවිතාන්තය දක්වා බරපතල වැඩ සහිත සිරඳඬුවමක් විඳීමට සිදුවීමට ඉඩ ඇතිබවත්" එම වාර්තාවල දැක්විණි.

අප්‍රිකානු ජාතීන් අතර එරිට්‍රියා සහ ඉතියෝපියා රටවල ළමිස්සියන් රූබර බවට විශ්වාසයක්ද ඇත.