පසුගිය වසරේ මාර්තු මස 8 වැනිදා සිට මේ දක්වාම අතුරුදන්වු මගීන් 239 දෙනෙකු රැගෙන මලයාසියාවේ ක්වාලාලම්පූර් නුවර සිට චීනයේ බීජිං නුවර බලා පියාසර කරමින් තිබූ මලයාසියා ගුවන්සේවයට අයත් එම්.එච් 370 අංක දරන ගුවන්යානය අනතුරකට භාජනය වී ඇතැයිද,එහි ගමන්කළ  සියලූදෙනා මරුමුවට පත්ව ඇතැයිද මලයාසියාව නිල වශයෙන් නිවේදනය කර තිබේ.

මලයාසියා ගුවන්සේවා බළධාරීන් මේ තීරණය ගෙන ඇත්තේ යානය අතුරුදන්වූ දිනයේ පටන් මේ දක්වා සිදු කළ මෙහෙයුම් වලින් කිසිදු තොරතුරක් සොයාගත නොහැකිව තිබෙන තැනය.මේ සමග යානයේ ගමන් කළ පුද්ගලයින්ගේ ඥාතිීන්ට තමන්ට සිදුවූ ආපදාව වෙනුවෙන් වන්දි ඉල්ලා සිටීමටද අවස්ථාව හිමිවේ.

කෙසේවුවත් යානය සොයා මෙහෙයුම් කටයුතු දිගටම කි‍්‍රයාත්මක කරන බව මලයාසියා සිවිල් ගුවන්සේවා අධිකාරිය පවසයි.

යානය එහි නියමිත ගමන් මාර්ගයෙන් ඉතා දුරට ඇදී ගොස් තිබෙන බවක් පෙන්නුම් කරන හෙයින් ඒ ගැන විශේෂ විමර්ෂණයක් කිරීමට මේ දිනවල අවධානය යොමුව තිබේ.ඊට අමතරව මලයාසියා රජය යානයේ අතුරදන්වීම අපරාධයක් හැටියට සැළකිල්ලට ගෙන වෙනම විශේෂ පරීක්ෂණයක්ද අරඹා ඇත.

එළැඹෙන මාර්තු මස 8 වැනිදාට යානය අතුරදන්ව හරියටම වසරක් සැපිරේ.