තමා සේවය කළ විශ්ව විද්‍යාලයේ සිසුවකුට පහරදීම හා ඔහුට අසුචී ආහාරයට ගෙන මුත්‍රා පානය කිරීමට බල කිරීම සම්බන්ධයෙන් වැරදිකරුවකුවූ දකුණු කොරියාවේ විශ්ව විද්‍යාලයක හිටපු මහාචාර්යවරයකුට වසර 12ක සිර දඬුවමක් ලබාදීමට එරට අධිකරණය තීරණය කර ඇත.

වසර දෙකකට පෙර වූ එම සිදුවීමට සහාය දැක්වූ තවත් තිදෙනකුටද වසර තුනේ සිට හය දක්වා සිර දඬුවම් හිමිවිය.

සුවෝන් දිස්ත්‍රික් අධිකරණය මෙසේ දඬුවම් දුන් අතර වයස අවුරුදු 52 ක් වන මහාචාර්යවරයා සිදුකළ ක්‍රියාව ඉතා බරපතල බවත් ඊට දැඩි දඬුවම් පැමිණවිය යුතු බවත් අධිකරණය පැහැදිලි කළේය.

හිටපු මහාචාර්යවරයා සහ අනෙක් තිදෙනා එම සිසුවාගේ වරදකට හා ඔහුගේ නරක හැසිරීමට එරෙහිව බේස් බෝල් පිත්තකින් පහරදී ඇතැයි පොලිසිය කියයි. වැරදිකරුවන්වූ තිදෙනා සිසුවාගේ හිස පොලිතින් බෑගයකින් වසා ඊට ගම්මිරිස් කුඩු ඉස ඇතැයිද පොලිසිය පවසයි. ඉන්පසු ප්ලාස්ටික් බෝතල්වල දමා තිබූ ඔවුන්ගේ මළ මූත්‍ර සිසුවාට ආහාරයට ගන්නා ලෙස බලකර ඇතැයි කියති.

මේ සිදුවීමෙන් බරපතල තුවාල ලැබූ සිසුවා පසුගිය වසරේ සැත්කමකටද භාජනය කර ඇතැයි එරට ප්‍රවෘත්ති සේවා පවසයි.

සිසුවා අධිකරණයට කියා ඇත්තේ හිටපු මහාචාර්යවරයාගේ මෙවැනි සාහසික ක්‍රියාකාරකම් තමා විසින් ඉවසා සිටියේ ඔහු තමාට රැකියාවක් සොයාගැනීමට උදව් කරන බව පැවසූ නිසා බවයි.

එම මහාචාර්යවරයා පසුගිය අගෝස්තු මාසයේදී විශ්ව විද්‍යාලයෙන් නෙරපා හැර ඇතැයි කියති.