ජම්මු සහ කාශ්මීරයේ, ශ්‍රී නගර් හි ගණිත ගුරුවරයකු සූර්ය බලයෙන් ධාවනය කළ හැකි විදුලි මෝටර් රථයක් නිර්මාණය කර ඇත.

මෙය දැරිය මිලකට අලෙවි කළ හැකි යැයි ද පැවසේ. ජම්මු සහ කාශ්මීරයේ ටන්මාර්ග් හි ජීවත්වන බිලාල් අහ්මඩ් මෙලෙස මෝටර් රථය නිර්මාණය කර තිබේ.

බිලාල් අහ්මඩ් ගණිත ගුරුවරයකු පමණක් නොව නවෝත්පාදකයෙකි.

හෙතෙම අවුරුදු 13කට ආසන්න කාලයක් මෙම ව්‍යාපෘතිය සඳහා වෙහෙස වී තිබේ.

“ආබාධිත පුද්ගලයන් වෙනුවෙන් තමයි මෝටර් රථය නිර්මාණය කරන්න අවශ්‍ය වුණේ. ඒත් මූල්‍ය බාධා නිසා මට එය කරගන්න බැරි වුණා. ඒ අතරේ තමයි මට හිතුණේ සූර්ය බලය ගැන. සූර්ය බලයෙන් ක්‍රියාත්මක වන මෝටර් රථයක් හදන්න. මොකද ඒක වියදමක් නැති මූලාශ්‍රයක්. මම මෑතකදී පත්තවරලත් දැක්කා. තවත් අවුරුදු 10කින් පෙට්‍රල් මිල ගණන් මීටත් වඩා වැඩි වෙනවා කියලා” යැයි බිල්ලා අහ්මඩ් පැවැසීය.

එක්දහස් නවසිය පනහේ (1950) දශකයේ නිර්මාණය කෙරුණු විවිධාකාරයේ සුඛෝපභෝගී මෝටර් රථ ගැන තමන් අධ්‍යයනයක් කළ බව ද ඔහු කීය.

මේ වනවිට සූර්ය බලශක්තියෙන් ධාවනය කෙරෙන මෝටර් රථයක් දැරිය හැක්කේ ධනවත් හෝ ප්‍රභූ හෝ පුද්ගලයන්ට පමණි. එම බාධාව ඉවත් කරමින් පොදු ජනතාවට ද පහසුකම් ඇති සූර්ය බලයෙන් ක්‍රියාත්මක වන මෝටර් රථයක් නිර්මාණය කිරීමට බිලාල් අහ්මඩ් සමත්ව තිබේ.

(ඒ.එන්.අයි.)