සතුන් සුරැකීමේ කණ්ඩායම් මගින් ප්‍රබලව එල්ල කරන ලද විරෝධය නොසලකා හරිමින්, ඇමෙරිකානු ජනාධිපති ඩොනල්ඩ් ට්‍රම්ප් මහතාගේ පාලන තන්ත්‍රය, ‘සයනයිඩ් බෝම්බ’ නමින් හඳුන්වන, මතභේදයට තුඩු දුන් උග්‍ර විස සහිත උගුල් යොදාගනිමින්, වනාන්තරවල වෙසෙන හිවලුන්,  කයෝටි නම් වෘකයන් සහ නොහික්මුණු සුනඛයන් මරාදැමීමට නැවත අවසර දී තිබේ.
 
M-44s නම් උපාංගය මෙම උගුල් සඳහා යොදාගෙන ඇත. තණකොළ සහිත භූමියක සිටුවන දිය ඉසීමේ උපකරණයට සමාන මෙම උගුල, කිසියම් සත්වයකු කටින් ඩැහැගෙන සැපීමේදී එහි අභ්‍යන්තරයේ ඇති සෝඩියම් සයනයිඩ් මුදාහැරේ. මේ හේතුවෙන් වනජීවිහු මිය යති.
 
ඇමෙරිකාවේ අයිඩහෝ ප්‍රාන්තයේදී කුඩා පිරිමි ළමයකු තුවාල ලැබීමත්, ඔහුගේ සුරතල් බලුපැටවා මරණයට පත්වීමත් හේතුවෙන්, ට්‍රම්ප් ආණ්ඩුව පසුගිය වසරේදී මෙම උගුල් භාවිතය නතර කර තිබිණි. එම දරුවාගේ පවුලේ සාමාජිකයන් ආණ්ඩුවට එරෙහිව නඩුවක් ද ගොනු කර තිබිණි.
 
බලධාරීන් විසින් මෙම තීරණය ප්‍රකාශකිරීමත් සමඟ ඇමෙරිකාවේ පරිසරය සුරැකීමේ සංවිධාන සහ කණ්ඩායම්, 20,000කට අධික ලිපි සංඛ්‍යාවක් එවමින් ඊට ප්‍රබල විරෝධයක් එල්ල කළේය.
 
“M-44s මිනිසුන්ට පවා භයානක උගුලක්. සුරතල් සතුන්ට වගේම වනයේ වෙසෙන සතුන්ටත් මෙය හානිකරයි. මේ සයනයිඩ් උගුල් භාවිතය ඉතා ම අවදානම්” යැයි ඇමෙරිකාවේ ජෛව විවිධත්ව මධ්‍යස්ථානයේ අධ්‍යක්ෂිකා කොලට් ඇඩ්කින්ස් මහත්මිය පැවසුවාය.

රාජ්‍ය දත්ත වාර්තා අනුව මෙම M-44s උගුලින්  2018දී සතුන් 6,579ක් මියගොස් ඇති අතර, ඒ අතර ඉලක්ක නොකරන ලද සත්තු 200ක් ද වෙති. රැකූන්, උරුලෑවන් වැනි කුඩා සත්තු සහ වලසුන් වැනි තරමක විශාල සත්තුද ඒ අතර සිටිති.
 
මාර්ගවල සිට අඩි 100ක පමණ දුරක ඒවා ස්ථානගත නොකිරීමටත්, එම උගුල් අටවන ස්ථානවල සිට අඩි 15ක පමණ දුරකින් අනතුරු ඇගවීමේ දැන්වීම් සවිකළ යුතු බවටත්, පළකරමින්  ඇමෙරිකාවේ පරිසරය සුරැකීමේ ඒජන්සිය මේ සඳහා සීමා පනවා තිබිණි.

(ඒඑෆ්පී ඇසුරිනි)

16844