දැඩි ආර්ථික අර්බුදයකට මුහුණ පා සිටින පකිස්තානයට ඇමෙරිකා එක්සත් ජනපද ඩොලර් බිලියන 8 ක මූල්‍ය පැකේජයක් ලබා දීමට සෞදි අරාබි රාජ්‍ය කැමැත්ත පළ කර ඇත.

පකිස්තාන අග්‍රාමාත්‍ය ශෙබාස් ෂරීෆ්ගේ සෞදි අරාබි සංචාරය අතරතුර පකිස්තානය වෙනුවෙන් මෙසේ  ඇමෙරිකානු ඩොලර් බිලියන 8 ක මූල්‍ය පැකේජයක්  සුරක්ෂිත කරගැනීමට හැකි වූ ඉන්දීය මාධ්‍ය වාර්තා කළේය.නව අග්‍රාමාත්‍යවරයා ලෙස පත් වීමෙන් අනතුරුව අග්‍රාමාත්‍ය ශෙබාස් ෂරීෆ්ගේ පළමු නිල සංචාරය මෙය වේ.

සෞදි අරාබි රාජ්‍ය ලබා දෙන ඩොලර් බිලියන 8 ක මුල්‍ය පැකේජයට ඉන්ධන සඳහා මුල්‍ය පහසුකමක් ද ,තැන්පතු හෝ බැඳුම්කර ස්වරූපයෙන් ලබා දෙන ණය මුදලක්ද ඇතුළත් වේ.

එසේම ඉම්රාන් ඛාන් අග්‍රාමාත්‍යවරයාව සිටින කාලයේදී සෞදි අරාබි රාජ්‍ය පකිස්තානයේ තැන්පත් කල ඇමෙරිකානු ඩොලර් බිලියන 3 ක සංචිතය 2023 ජුනි මස තෙක් පවත්වා ගෙන යාමට සෞදි අරාබි රාජ්‍ය එකඟතාව පළ කර ඇත.ඒ අග්‍රාමාත්‍ය ශෙබාස් ෂරීෆ් සෞදී අරාබි මොහොමඩ් බින් සල්මන් කුමරු හමුවූ අවස්ථාවේ කළ ඉල්ලීමකට අනූවය.

සෞදි අරාබි රාජ්‍ය විසින් පකිස්තානයට බොරතෙල් සහ අනිකුත් ඛනිජ තෙල් නිශ්පාදන තවදුරටත් සැපයීම සඳහා එකඟත්වය පළ කර ඇත.
ඉම්රාන් ඛාන් අගමැති ධුරය දරණ අවස්ථාවේ වසරක කාලයක් සඳහා ලබා දුන් ඇමෙරිකානු  ඩොලර් බිලියන 4.2 ක මුල්‍ය පැකේජය මෙසේ ඇමෙරිකානු  ඩොලර් බිලියන 8 ක් දක්වා වැඩි කර ඇත.හිටපු අගමැති ඉම්රාන් ඛාන්ට  ලබාදුන් ඩොලර් බිලියන 1.2 ක ඉන්ධන මුල්‍ය පහසුකම මෙම අවස්ථාවේ ඩොලර් බිලියන 2.4 ක් දක්වා වැඩි කර ඇත.

සෞදි අරාබි සංචාරය අවසානයේ  අග්‍රාමාත්‍ය ශෙබාස් ෂරීෆ් සහ නියෝජිත පිරිස ඉස්ලාමාබාද් නුවර බලා පිටත්ව ගොස් ඇති අතර මුදල් අමාත්‍ය මිෆ්ටා ඉස්මේල් වැඩි කරන ලද  මූල්‍ය පැකේජය ලබා ගැනීම සඳහා අවශ්‍ය ගිවිසුම් අත්සන් කිරීම සඳහා සෞදි අරාබියේ නතර වී ඇත.අග්‍රාමාත්‍ය ශෙබාස් ෂරීෆ් සහ නියෝජිත පිරිස ඉස්ලාමාබාද් නුවර බලා පැමිණෙන අවස්ථාවේ කෙටි වෙලාවකට අබුඩාබි නුවරට ගොස් ඇති අතර  එහිදී එක්සත් අරාබි රාජ්‍යයේ මොහමඩ් බින් සයෙඩ් කුමරු මුණ ගැසී ඇත.

(රොයිටර්)