ඉතිහාසයේ ප්‍රථම වතාවට සෞදි අරාබියේ කාන්තාවන්ට  ප්‍රේක්ෂකාගාරයකට ගොස් සජීවීව පාපන්දු තරඟයක් නැරඹීමේ අවස්ථාව හිමි වී ඇති බව වාර්තා වේ.

දැඩි මතධාරී මුස්ලිම් රටක් ලෙස කාන්තාවන්ට පනවා තිබූ නීතිරීති ලිහිල් කිරීමට සෞදි රජු ප්‍රමුඛ රජය පසුගිය කාලයේ  පියවරගත් අතර එහි එක් අංගයක් ලෙස මෙය ක්‍රියාවට නගා ඇත.

මේ අනුව පසුගිය සිකුරාදා ජෙඩා නගරයෛ් ක්‍රීඩාංගනයක දොරටු කාන්තාවන්ට විවෘත වූ අතර මෙය සෞදි රාජ්‍යයට සුවිශේෂී අවස්ථාවක් වූ බව මාධ්‍ය වාර්තා කර ඇත. තරඟය නැරඹීමට පැමිණි කාන්තාවන්ගෙන් ප්‍රේක්ෂකාගාරය පිරීගොස් තිබුණු අතර කාන්තාවන් ලද මෙම සුවිශේෂී ජයග්‍රහනය සම්බන්දව තමත් ඉතා ප්‍රීතිමත්ව සිටින බව ඔවුන් පවසා ඇත.

මීට සමගාමීව නූතන ලෝකයට ගැලපෙන පරිදි සෞදි රාජ්‍යයේ තවත් බොහෝ ප්‍රතිසංස්කරණ සිදුකිරීමට පියවර ගෙන ඇති අතර මෝටර් රථ ප්‍රදර්ශනාගාර  කාන්තාවන් වෙත විවෘත කිරීම ද පසුගියදා සිදුවිය. 

කාන්තාවන්ට පනවා තිබූ මෝටර් රථ පැදවීමේ තහනම ද පසුගිය ජුනි මාසයේ ඉවත් කිරීමට තීරණය කෙරුනු අතර ලබන සැප්තැම්බර් මාසයේ සිට මෙය ක්‍රියාවට නැංවීමට නියමිතය.

සෞදියේ දැඩි මතධාරී මූලධර්ම මෙලෙස ලිහිල් වුවද පුරුෂයෙකුගේ අවසරය නොමැතිව කාන්තාවන්ට ඉටුකල නොහැකි තවත් බොහෝ කාර්යයන් පවතින බව වාර්තා වේ. ගුවන් ගමන් බලපත්‍රයකට අයදුම් කිරීම, විවාහ වීම, ව්‍යාපාරයක් ආරම්භ කිරීම, ශල්‍ය කර්යමක් සිදු කිරීම, බැංකු ගිණුමක් විවෘත කිරීම වැනි තවත් බොහෝ දේ ඒ අතර වේ.

(බීබිසී ඇසුරිණි - 085)