ස්ත්‍රී දූෂකයන්ට, මිනීමරුවන්ට කිසිදු සමාවක් නොදිය යුතු බවත්, ඔවුන්ට එරෙහිව මරණ දඬුවම ක්‍රියාත්මක විය යුතු බවත්, ඇමෙරිකා ජනාධිපති ධුරයට තේරී පත් වී සිටින ඩොනල්ඩ් ට්‍රම්ප් අවධාරණය කරයි. 

ට්‍රම්ප් මේ බව අවධාරණය කළේ, මේ වනවිට මරණ දණ්ඩනය නියම වී සිටින ඇමෙරිකාවේ දරුණු අපරාධකරුවන් 40 දෙනකුගෙන් 37 දෙනකුගේ මරණ දඬුවම ක්‍රියාත්මක නොකරන්නැයි ධුරයෙන් ඉවත් වීමට සූදානමින් සිටින ජනාධිපති ජෝ බයිඩන් කළ ප්‍රකාශයට ප්‍රතිචාර දක්වමිනි. බයිඩන් පෙන්වා දී ඇත්තේ, එම අපරාධකරුවන් 37 දෙනාගේ මරණ දඬුවම ජීවිතාන්ත සිරදඬුවමකට වෙනස් කළ යුතු බවය. ට්‍රම්ප් ඇමෙරිකා ජනාධිපති ලෙස දිවුරුම් දෙන්නේ ලබන ජනවාරි 20 වැනිදාය.

‘ස්ත්‍රී දූෂකයන්, මිනීමරුවන් කියන්නේ දරුණු ගණයේ අපරාධකරුවන්. ඔවුන්ට කිසිම ආකාරයකට සමාව දීමක් කළ යුතු නැහැ. අධිකරණය හමුවේ වරදකරුවන් වී සිටිනවා නම්, මරණ දඬුවම නියම වී සිටිනවා නම්, මරණ දඬුවම ක්‍රියාත්මක කළ යුතුයි. කිසිසේත් සමාව දීමක් අවශ්‍ය වන්නේ නැහැ” යැයි ට්‍රම්ප් පැහැදිලි කර ඇත.