මදුරුවන්ගෙන් බෝවන සිකා වෛරසය හේතුවෙන් බ්‍රසීලයේ අලුත උපදින දරුවන් 4000කගේ පමණ මොළයට හානි සිදුව ඇතැයි විදෙස් පුවත් සේවා පවසයි.

මෙම වෛරසය ඩෙංගු රෝගය හා චිකුන්ගුන්යා රෝගයට බෙහෙවින් සමාන බව වෛද්‍යවරු කියති. මහද්වීප පහකදී මෙම වෛරසය හඳුනාගෙන ඇතැයි ලෝක සෞඛ්‍ය සංවිධානය කියයි. ඇමරිකා මහද්වීපයේ කැනඩාව හා චිලී හැර අනෙක් සියලු රටවලට වෛරසය පැතිර ඇතැයිද බ්‍රසීලයේ දරුණු ලෙස මෙය ව්‍යාප්තව ඇතැයිද ලෝක සෞඛ්‍ය සංවිධානය අනතුරු අඟවයි.

ඊඩිස් ඊඩිප්ටයි ලෙස හඳුනාගෙන ඇති මදුරු විශේෂයක් හරහා වෛරසය බෝවීම සිදුවන බවත් උණ, හිසරදය, ඇස් රතුවීම, සන්ධිපත් වේදනාව හා සමේ රතු පැහැ ලප හටගැනීම මෙහි රෝග ලක්ෂණ බවද කියති.

1940 අප්‍රිකාවේ උගන්ඩාවෙන් සිකා වෛරසය හඳුනාගෙන ඇති අතර 2013 වසරේදී බ්‍රසීලයේ ප්‍රබල ලෙස වෛරසය පැතිර ගිය බවද වාර්තාවේ. වෛරසය හේතුවෙන් හිස කුඩාවූ දරුවන් ඉපදීම සිදුවන බවත් වෛද්‍යවරු කියති. මදුරු නාශක දියර බ්‍රසීලයේ රියෝද ජැනයිරෝ නුවර වීදි පුරා ඉසින ආකාරය ද විදෙස් මාධ්‍ය වාර්තා කර තිබිණි.