එළිමහනේ මළ පහ කිරීමේ පුරුද්ද මඟ හැරවීමේ සහ වැසිකිළි භාවිතය හුරු කරවීමේ අරමුණින් ඉන්දියාවේ ගුජරාඨ ප‍්‍රාන්තයේ අහමදාබාද් නුවර පොදු වැසිකිළි භාවිතා කරන්නන්ට ඉන්දීය රුපියලක්(ශ්‍රී ලංකා රුපියල් 2) ලබා දීමට අහමදාබාද් නගර සභාව පෙරේදා (10) තීරණය කළේය.

මෙම නව වැඩපිළිවෙළට අහමදාබාද් ස්ථාවර කාරක සභාවේ ද අනුමැතිය හිමිවී ඇති අතර, ඉදිරි දින කිහිපයේදී එය කි‍්‍රයාවට නැංවෙනු ඇතැයි ඉන්දීය මාධ්‍ය වාර්තා කරයි.

ඉන්දීය අගමැති මෝදි උපන් ප‍්‍රාන්තය වන්නේ ද ගුජරාඨයයි. අගමැති මෝදි ඉන්දියාව පිරිසුදු තැනක් කිරීමේ අරමුණින් ආරම්භ කර ඇති ‘ස්වාච් භාරත්’ වැඩසටහනට අනුව මෙම නව  වැඩපිළිවෙළ කි‍්‍රයාත්මක වන බව පුරපතිනී මීනක්ෂි පටෙල් පවසා ඇත.

‘නගරයේ පොදු වැසිකිළි 315 ක් තිබෙනවා. නමුත් ඒවායින් 120 ක් පමණ භාවිතයට ගැනෙන්නේ නැහැ. වැසිකිළි යෑමට මුදල් ගෙවීම සිදුවන්නේ මෙම වැසිකිළිවලයි.’ යනුවෙන් අහමදාබාද් ස්ථාවර කාරක සභාවේ සභාපති ප‍්‍රවීන් පටෙල් මාධ්‍ය හමුවේ අදහස් දක්වමින් පවසා ඇත.

ඉන්දියානුවන් බොහෝ දෙනා වැසිකිළි පාවිච්චි නොකරන හෙයින්, එය සෞඛ්‍ය ගැටලූ රැසකට හේතුවක් වී ඇති බව එරට සෞඛ්‍ය බලධාරීහු නිරන්තරයෙන් මැසිවිලි නගති.

වැසිකිළි භාවිතා නොකරන බොහෝ දෙනාගේ අදහස වී ඇත්තේ එළිමහනේ නිදහසේ මළ මුත‍්‍ර පහ කිරීම සුව පහසු කි‍්‍රයාවලියක් කියාය. සනීපාරක්ෂණය සම්බන්ධයෙන් කොතරම් දැනුම්වත් කළත් මෙවැනි  ආකල්ප වෙනස් කිරීම ඉන්දීය සෞඛ්‍ය බලධාරීන්ට ගැටලූවක් වී ඇත.

ඒ සඳහා පිළියමක් ලෙස වැසිකිළි භාවිතා කරන්නන්ට මුදල් දීමට අහ්මදාබාද් නගර සභාව ගත් තීරණය ප‍්‍රසංශනීය යැයි අගමැති මෝදි පවසා ඇත.

(ඉන්දීය පුවත් සේවා ඇසුරිනි)