වෙනත් පුද්ගලයකු සුරතලයට ඇති කළ වඳුරකු සපාකෑම නිසා තම දියණිය තුවාල ලැබුවේ යැයි උරණවූ දෙමාපිය යුවළක් එයට පළිගනු වස් ඇති කරගත් ගැටුමක් පුද්ගලයින් 20 දෙනකු මරණයට පත්වීම දක්වා දුරදිග ගොස් ඇති පුවතක් ලිබියාවෙන් වාර්තා වේ.

ගෝත‍්‍ර දෙකකට අයත් ජන කොටස් අතර මෙම ගැටුම හටගෙන ඇති අතර මුලින් මරු දැක ඇති බව සදහන් වන්නේ වඳුරාගේ හිමිකරු ඇතුළු පුද්ගලයින් දෙදෙනෙකි.

මෙම ගෝත‍්‍ර දෙක අතර කාලයක පටන්ම හිත් අමනාපකම් පැවත ඇති බව පැවසේ.

දින ගණනාවක් පුරා ඇවිලෙන ගැටුම තවමත් අවසන්ව නොමැති බවත්, මියගොස් ඇති පුද්ගලයින්ගේ සංඛ්‍යාව මිීට වඩා වැඩි විය හැකි බවත් එරට මාධ්‍ය වාර්තා කරයි.

ලිබියාව අසාර්ථක දේශයක් ලෙස සැළකෙන අතර, හිටපු පාලක මුවමර් ගඩාෆිගේ මරණයෙන් පසු එරට පාලනය රජයක් යටතට පත්වුවද තවමත් ලිබියාව එක්සත් කිරීමට නොහැකිව ඇත.

ලිබියාවේ ඇතැම් කොටස් වල පාලනය පවතිනුයේ රජය යටතේ නොව විවිධ ජන කොටස් යටතේය.රටේ සම්පූර්ණ පාලනය දිනා ගැනීමට මෙම ජන කොටස් එකිනෙකා සමග මෙන්ම රජය සමගද යුද වැද සිටින්නේය.