රුසියාව සිය හමුදා ශක්තිය වැඩි කරගනිමින් සිටින අතර, අවුරුදු 18 ත් 30 ක් අතරේ තරුණයන් 1,60,000 ක පිරිසක්, හමුදාවට බඳවා ගන්නැයි එරට ජනාධිපති ව්ලැදිමීර් පුටින් නියෝග කර තිබේ.

රුසියන් හමුදාවට මේ අයුරින් නව බඳවා ගැනීමක් සිදුවන්නේ 2011 වසරෙන් පසුව යැයි එරට මාධ්‍ය වාර්තා පෙන්වා දෙයි. රුසියන් හමුදාවට අයත් සාමාජිකයන් ගණන මිලියන 2.39 ක් වන අතර, ඔවුන් අතරින් ක්‍රියාකාරී හමුදා සාමාජිකයන් ගණන මිලියන 1.5 ක් බව පැවැසෙයි.

රුසියාව, මේ වනවිට අසල්වැසි යුක්රේනය සමඟ යුද්ධයකට පැටලී සිටී. ඒ, යුක්රේනය ‘නේටෝ’ සාමාජිකත්වය අපේක්ෂා කරන බැවිනි. ‘නේටෝ’ යනු උතුරු අත්ලාන්තික් ගිවිසුම් සංවිධානයයි. මෙය බටහිර රටවල එකමුතුවෙන් පිහිටුවාගත් යුද සංවිධානයකි. යුක්රේනයට නේටෝ සාමාජිකත්වය හිමිවීම රුසියාවේ ජාතික ආරක්ෂාවට විශාල තර්ජනයකි. රුසියන් ජනාධිපති පුටින්, යුක්රේනයට එරෙහිව හමුදා ක්‍රියා මාර්ගයක් ගෙන ඇත්තේ මේ නිසාය.

හමුදාවට තරුණයන් 1,60,000 ක පිරිසක් බඳවා ගන්නැයි රුසියන් ජනාධිපති පුටින් ලබා දුන් නියෝගය සම්බන්ධයෙන් රුසියන් හමුදාව පවසා ඇත්තේ, මෙම නව සාමාජිකයන් බඳවා ගැනීම සහ රුසියන් යුක්රේන යුද්ධයට කිසිදු සම්බන්ධයක් නොමැති බවය.

මේ අතර රුසියන් යුක්රේන යුද්ධය අවසන් කරමින්, තිරසාර සටන් විරාමයක් සහ සාම වැඩපිළිපෙළක් සකස් කිරීමට ඇමෙරිකා ජනාධිපති ඩොනල්ඩ් ට්‍රම්ප් සහ ඔහුගේ පරිපාලනය ඉදිරිපත් වී සිටී. රුසියන් සහ යුක්රේන නියෝජිතයන් හවුල් කර ගනිමින්, සෞදියේ දී සාකච්ඡා වටයක් පැවැත්විණි. කෙසේ නමුත් එම සාකච්ඡා මෙතෙක් ඵලදායී වී නැත.

(ඒ.එෆ්.පී.)