බ්‍රසල්ස්හිදීය (රොයිටර්)
 
ඇමෙරිකා එක්සත් ජනපදය පැනවූ තීරුබදුවලට එකට එක කිරීමක් ලෙස යුරෝපා සංගමය අද (22) ඇමෙරිකා නිෂ්පාදන මත සියයට 25ක බද්දක් පැනවීමට තීරණය කළේය. 
 
යුරෝපා සංගමයේ රටවල් ඇමෙරිකාවට අපනයනය කරන වානේ සහ ඇලුමිනියම් මත තීරුබදු පැනවීමට ජනාධිපති ට්‍රම්ප් මේ මස මුලදී පියවර ගත්තේය. යුරෝපා සංගමය මෙලෙස ඇමෙරිකා නිෂ්පාදන මත බදු පැනවූයේ ඊට ප්‍රතිචාර දැක්වීමක් ලෙසය.
 
යුරෝපා සංගමය ගන්නා ලද මෙම පියවරත් සමඟ ඇමෙරිකා එක්සත් ජනපදය සහ චීනය අතර ඇති වෙමින් තිබෙන වෙළෙඳ යුද්ධය සම්පූර්ණ වෙළෙඳ යුද්ධයක් බවට පත්වනු ඇත. 
 
ඇමෙරිකා ජනාධිපතිවරයා චීන නිෂ්පාදන මත බදු තීරු බදු පැනවීමට තීරණය කළ අතර ඊට ප්‍රතිචාර දැක්වීමක් ලෙස චීනය ද ඇමෙරිකා නිෂ්පාදන මත බදු පැනවීය. ඒත් සමඟ දෙරට අතර වෙළෙඳ යුද්ධයක් ඇති වූ අතර යුරෝපා සංගමයත් ඇමෙරිකා නිෂ්පාදන සමඟ බදු පැනවීමත් සමඟ ගෝලීය වෙළෙඳ යුද්ධයක් ඇති වී තිබේ. 
 
ඇමෙරිකාව එක් පසකට වනවිට ඇමෙරිකාවේ මිත්‍ර රටවල් වන යුරෝපා සංගම් රටවල් සහ ඇමෙරිකාවේ ප්‍රතිපාර්ශවය වන චීනය තවත් පසකට වී තිබේ. ඇමෙරිකාවේ බදු පැනවීමේ තීරණ අසාධාරණ සහ අයුක්තිසහගත යැයි චීනය පමණක් නොව ඔවුන්ගේ මිත්‍ර රටවල් ද චෝදනා කරයි. 
 
යුරෝපා කලාපයේ නිෂ්පාදනය කෙරෙන මෝටර් රථ ආනයනය කිරීම නැවැතීමට හෝ ඒවා මත තීරු බදු පැනවීමට පියවර ගන්නා බවට ද ඇමෙරිකා ජනාධිපතිවරයා අනතුරු අඟවා තිබේ. 
 
ඊයේ (22) ගන්නා ලද තීරණයට අනුව යූරෝ බිලියන 2.8ක ( ඇමෙරිකා එක්සත් ජනපද ඩොලර් බිලියන 3.2ක) ඇමෙරිකා එක්සත් ජනපද නිෂ්පාදන යුරෝපා සංගමයේ වෙළෙඳ කොමිසම අනුමැතිය දී තිබේ.  
 
“අප මේ දේ කරන්නේ කැමැත්තෙන් නෙමෙයි. අපට මෙවැන්නක් කරන්න ඕන වුණේ නැහැ. එහෙත් ඇමෙරිකා එක්සත් ජනපදයේ ඒකපාර්ශවීය සහ අසාධාරණ තීරණ නිසා අපට වෙන තෝරාගැනීමක් නැතිවුණා” යැයි යුරෝපා සංගම් වෙළෙඳ කොමිසමේ කොමසාරිස් සිසිලියා මාල්ම්ස්ත්‍රොම් නිවේදනයක් නිකුත් කරමින් සඳහන් කළාය. 
 
055