යුක්රේනයේ නැගෙනහිර ලුහාන්ස්ක් කලාපයේ ඇතිවූ ලැව් ගින්නක් හේතුවෙන්  4 දෙනකු මියගොස් 10 දෙනකු තුවාල ලබා තිබේ.

යුක්රේන හදිසි සේවා අංශය පවසන්නේ ගින්නෙන් ලුහාන්ස්ක් කලාපයේ නිවාස 22 කට පමණ තර්ජන එල්ලවී ඇති බවයි.

හෙක්ටයාර 18,000 ක පමණ භූමි ප්‍රමාණයකට හානි සිදුවී ඇති අතර 120 දෙනකු පමණ ප්‍රදේශයෙන් ඉවත්කර සුරක්ෂිත ස්ථානවල රඳවා ඇත.

ප්‍රාදේශීය බලධාරීන් පවසන්නේ ස්ථාන 146කින් ගිනිගැනීම් වාර්තා වූ බවයි. එයින් ගිනිගැනීම් 82ක් මේ වනවිට නිවා දමා ඇති බවද ඔවුහු පවසති.

මෙම ගිනිගැනීම් වාර්තා වන්නේ රුසියානු හිතවාදී බෙදුම්වාදීන් විසින් පාලනය කරනු ලබන ප්‍රදේශ ආසන්නයේ වන අතර බෙදුම්වාදීන් විසින් ෂෙල් වෙඩි ප්‍රහාර එල්ල කරන බවද යුක්රේන බලධාරීහු පවසති.

ගිනිගැනීම් ඇතිවීමට හේතුව සොයා පරීක්ෂණයක් සිදුකරන ලෙස යුක්රේන ජනාධිපති කාර්යාලය ආයතන වලින් ඉල්ලා තිබේ.

(රොයිටර් පුවත් ඇසුරිණි - 085)