රුසියන් හමුදා දිගින් දිගටම එල්ල කරන මිසයිල සහ ෂෙල් වෙඩි ප්‍රහාර හේතුවෙන්, යුක්රේන නගර 1,162 කට විදුලිය නොමැති බවත්, පානීය ජල සැපැයුම් පවා අඩාල වී ඇති බවත් යුක්රේන මාධ්‍ය වාර්තා කරයි.

පසුගිය දින 8 ඇතුළත රුසියාවෙන් එල්ල වුණු මිසයිල සහ ෂෙල් වෙඩි ප්‍රහාර හේතුවෙන්, යුක්රේන විදුලි බලාගාරවලින් සියයට 30ක් මුළුමනින්ම විනාශ වී ඇතැයි යුක්රේන ජනාධිපති ව්ලොදිමීර් සෙලෙන්ස්කී ජාත්‍යන්තරයට දන්වා තිබේ. රුසියාවේ අරමුණ වී ඇත්තේ යුක්රේනයේ යටිතල විනාශ කර දැමීම යැයි ද යුක්රේන ජනාපධිතිවරයා චෝදනා නගා ඇත.

රුසියන් හමුදා ප්‍රහාර හේතුවෙන් කීව් අගනුවරට දැඩි හානි සිදුවී ඇති බවත්, නගරයේ ප්‍රදේශ රැසක ජල සැපැයුම මුළුමනින්ම අඩපණ වී ගොස් ඇති බවත් පැවැසෙයි. කීව් අගනුවර නගරාධිපති විටෙලි ක්ලයිටිෂ්කෝව් මාධ්‍ය හමුවේ පවසා ඇත්තේ නගරයට සිදුවී ඇති හානිය බරපතල බවය.

රුසියන් හමුදාව, යුක්රේනයේ නගරවලට පහර දීමට යොදා ගන්නේ ඇත්තේ ඉරානයේ නිෂ්පාදිත නියමුවන් රහිත ඩ්‍රෝන යානා යැයි යුක්රේන ජනාධිපති ව්ලොදිමිර් සෙලෙන්ස්කී පවසයි. එවැනි ඩ්‍රෝන යානා කීපයක්, පහර දීමට පැමිණෙද්දී, වෙඩි තබා බිම හෙලීමට තම සොල්දාදුවන් සමත් වූ බව ද ජනාපධිති සෙලෙන්ස්කී වැඩි දුරටත් පවසා ඇත. යුක්රේනයේ නගරවලට පහර දීමට රුසියන් හමුදා භාවිතා කරන්නේ ‘ෂාහිද් 136’ වර්ගයේ සහ ‘කමිකාසේ’ වර්ගයේ ඩ්‍රෝන යානා යැයි පැවැසෙයි.

රුසියාව, ඉරානයේ ඩ්‍රෝන යානා මිලදී ගෙන ඒවායින්, යුක්රේනයට පහර දීම රුසියා හමුදාවේ බංකොලොත්භාවය පෙන්නුම් කිරීමක් යැයි ද යුක්රේන ජනාධිපතිවරයා රුසියාවට දොස් නගමින් මාධ්‍ය හමුවේ අදහස් දක්වා ඇත.

මේ අතර, දිගින් දිගටම රුසියන් හමුදාවට ඩ්‍රෝන යානා සහ මිසයිල ලබා දීමට ඉරානය පොරොන්දු වී ඇතැයි විදෙස් මාධ්‍ය පෙන්වා දෙයි. ඉරාන උප ජනාධිපති මොහොමද් මොක්බාර්, එරට ආරක්ෂක කවුන්සිලයේ ප්‍රධානීන්, පසුගිය දා රුසියානු රජයේ නිලධාරීන් සහ රුසියානු ආරක්ෂක කවුන්සිලයේ ප්‍රධානීන් හමුවී සාකච්ඡා පැවැත්වූ බව ද වාර්තා වේ.

යුක්රේන සිවිල් වැසියන්ට අනතුරක් වන අයුරින්, යුක්රේන නගරවලට ප්‍රහාර එල්ල කිරීමට, ඉරානය රුසියාවට මිසයිල සහ ඩ්‍රෝන යානා ලබා දෙන්නේ නම්, ඉරානය සමඟ පවත්වන රාජ්‍ය තාන්ත්‍රික සබඳතා මුළුමනින්ම නැවැත්විය යුතු යැයි යුක්රේන විදේශ අමාත්‍ය දිමිත්‍රෝ කූබා යුක්රේන ජනාධිපති සෙලෙන්ස්කීට පවසා ඇතැයි ද වාර්තා වේ.  

(රොයිටර්)