ලොව අංක එකේ බිලියනපති, ඇමෙරිකන් ව්‍යාපාරික ඉලොන් මස්ක්ට ඕනෑම වෙලාවක දේශපාලන රැකවරණ ලබා දීමට තමන් සූදානම් යැයි රුසියාව පවසයි. 

රුසියාව මෙසේ පැවැසුවේ, ඇමෙරිකන් ජනාධිපති ඩොනල්ඩ් ට්‍රම්ප් සහ බිලියනපති ව්‍යාපාරික ඉලොන් මස්ක් අතරේ හටගෙන ඇති විරසකය සම්බන්ධයෙන් අදහස් දක්වමිනි.

ඉතා සමීප මිත්‍රත්වයකින් කටයුතු කළ ට්‍රම්ප් සහ මස්ක් අතරේ හටගත් එදිරිවාදිකම් දිනෙන් දින ඔඩුදුවන බව විදෙස් මාධ්‍ය වාර්තා පෙන්වා දෙයි. ට්‍රම්ප්ගේ ප්‍රතිපත්ති පනත, මස්ක්ගේ දැඩි විවේචනයට ලක් වී ඇති අතර, එම පනත හරහා අයවැය හිඟය වැඩිවන බව මස්ක් පෙන්වා දී ඇත. ට්‍රම්ප් ජනාධිපති ධුරයෙන් ඉවත් කළ යුතු බවත්, ට්‍රම්ප්ගේ දෙවැනියා ජේඩී වැන්ස් ජනාධිපති ධුරයට පත් කළ යුතු බවත් මස්ක් සමාජ මාධ්‍ය ඔස්සේ පවසා ඇත.

ට්‍රම්ප්, මස්ක්ට තර්ජනය කර ඇත්තේ, මස්ක්ගේ ටෙස්ලා සහ ස්පේස් සමාගම් සඳහා රජටෙන් ලැබෙන සහන සහ කොන්ත්‍රාත්තු කපා හරින බවටය. තමන් නොමැතිව මස්ක්ට කිසිවක් කළ නොහැකි බවත්, ඔහු උමතුවෙන් ක්‍රියා කරන බවත් ට්‍රම්ප් පවසා ඇත.

මස්ක් පෙරළා ප්‍රතිචාර දක්වා ඇත්තේ, තමන් නොසිටියා නම්, ට්‍රම්ප්ට ජනාධිපතිවරණය ජය ගැනීමට නොහැකි බවත්, ට්‍රම්ප්ගේ නම ද එප්ස්ටයින් ලිපි ගොනුවල ඇති බවත්ය. එප්ස්ටයින් ලිපි ගොනු යනු මූල්‍යවේදියකු සහ ලිංගික අපරාධකරුවකු වූ ජෙෆ්රි එප්ස්ටයින්ගේ ක්‍රියාකාරකම් සහ ඔහු සමඟ සම්බන්ධ වූ ඉහළ පෙළේ ප්‍රසිද්ධ පුද්ගලයන් පිළිබඳව ඇමෙරිකන් ෆෙඩරල් බලධාරීන් විසින් එකතු කරන ලද ලේඛන එකතුවය.

මීට පෙර, ඩොනල්ඩ් ට්‍රම්ප් විසින් රාජ්‍ය කාර්යක්ෂමතා දෙපාර්තමේන්තුවේ මෙහෙයවීමේ කටයුතු මස්ක්ට පවරා තිබුණි. මීට දින කීපයකට පෙර මස්ක් එයින් ඉවත් කිරීමට ට්‍රම්ප් කටයුතු කළේය. දෙදෙනා අතරේ විරසකය ප්‍රසිද්ධියට පත් වීම සිදුවූයේ ඉන් අනතුරුවය.
මස්ක්ගේ ස්පේස් එක්ස් සමාගම, ඇමෙරිකන් නාසා ආයතනය සමඟ හවුලේ කටයුතු කරන අතර, එම ගනුදෙනු සියල්ල නැවැත්වීමට ද මස්ක් තීරණය කර ඇතැයි පැවැසෙයි. ඊට අමතරව ඇමෙරිකන් යුද දෙපාර්තමේන්තුව හෙවත් පෙන්ටගනය සමඟ ඇතිකරගත් ගිවිසුම් අත්හිටුවීමට ද තමන් සූදානම් බව මක්ස් පවසා ඇත.

මේ අතර, මෙම ගැටුම සම්බන්ධයෙන් රුසියාවේ හිටපු ජනාධිපතිවරයකු වන දිමිත්‍රි මෙඩ්වදේව් සමාජ මාධ්‍ය ඔස්සේ සටහක් තබමින් මස්ක්ගෙන් මෙන්ම ට්‍රම්ප්ගෙන් ද ඉල්ලා ඇත්තේ හටගත් අර්බුදය සාමකාමීව විසඳා ගන්නා ලෙසය. අර්බුදය එසේ සාමකාමීව විසඳා ගන්නවා නම්, තමන් ඊට මැදිහත් වීමට ද කටයුතු කරන බව මෙද්වදේව් වැඩිදුරටත් පවසා ඇත.