මියන්මාරයේ රඛයින් පළාතේ ඇතිවූ ප්‍රචණ්ඩ ක්‍රියා හේතුවෙන් පසුගිය අගෝස්තු 24වනදා සිට සැප්තැම්බර් 24දක්වා කාලය තුළ රෝහින්ග්‍යාවරුන් 6700ක් පමණ මියගොස් ඇතැයි සරණාගතයින් සම්බන්ධව කරන ලද සමීක්ෂණයකින් හෙළිවී ඇත.

මෙඩිසින්ස් සෑන්ස් ෆ්‍රොන්ටියරස් නම් සංවිධානය සිදු කරන ලද මෙම සමීක්ෂණයෙන් හෙළි වි ඇත්තේ මෙම කාලය තුල මියගොස් ඇති මුළු සරණාගතයින් ප්‍රමාණය 9000ක් පමණ වන අතර එයින් සියයට 71ක් පමණ ප්‍රචණ්ඩ ක්‍රියා හේතුවෙන් මියගොස් ඇති බවත්ය. 
 
මියගොස් ඇති අයගෙන් 1000ක් පමණ අවුරුදු පහට අඩු දරුවන් බවද සොයාගෙන ඇත.  
 
සමීක්ෂණය සිදු කල සංවිධානය වෛද්‍යවරුන්ගෙන් සමන්විත වන අතර අන්තර්ජාතික මානවවාදී සේවා සපයන රාජ්‍ය නොවන සංවිධානයකි. 
දැනට බංගලාදේශයේ කඳවුරු වල රැදී සිටින සරණාගතයින් සමග සාකච්ඡා කර මෙම දත්ත රැස් කළ බව මෙඩිසින්ස් සෑන්ස් ෆ්‍රොන්ටියරස් සංවිධානයේ අධ්‍යක්ෂ සිඩ්නි වෝං පවසයි. 
 
මෙම කාලය තුළ රෝහින්ග්‍යා සරණාගතයින් 647000ක් පමණ බංගලාදේශයට පලාගොස් ඇති බවද ඔහු පවසයි. චෝදනා ප්‍රතික්ෂේප කරන මියන්මාර හමුදාව පවසන්නේ ත්‍රස්තවාදී ක්‍රියා හේතුවෙන් මෙම පිරිස මියගොස් ඇති බවයි. 
 
 
(සීඑන්එන් පුවත් ඇසුරිණි - 085)