එක්සත් අරාබි එමීර් රාජ්‍යයේදී ඉන්දීය අග්‍රාමාත්‍ය නරේන්ද්‍ර මෝදි ගෞරවයට පාත්‍ර වී ඇත.

ඉන්දීය අග්‍රාමාත්‍ය නරේන්ද්‍ර මෝදි එක්සත් අරාබි එමීර් රාජ්‍යය සිවිල් වැසියෙකුට ලබාදෙන ඉහළම සම්මානයෙන් පිදුම් ලබා ඇත.

දෙරට අතර සබඳතා ශක්තිමත් කර ගැනීමට දැක්වූ දායකත්වය වෙනුවෙන් ඔහුට එම සම්මානය ප්‍රදානය කෙරුණි 

එක්සත් අරාබි එමීර් රාජ්‍යයේ නිර්මාතෘවරයා වන ෂෙයික් සෙයිඩ් බින් සුල්තාන් අල් නහියන්ට (Sheikh Zayed bin Sultan al-Nahyan) ගෞරවයක් ලෙස ඕඩර් ඔෆ් සෙයිඩ් ('Order of Zayed') ලෙස නම්කර ඇති සම්මානය අග්‍රාමාත්‍ය නරේන්ද්‍ර මෝදිට ප්‍රදානය කළේ අබුඩාබියේ ඔටුන්න හිමි ෂෙයික් මොහොමඩ් බින් සෙයිද් කුමරු විසිනි.
 
විදෙස් මාධ්‍ය වාර්තා කළේ  එමීර් සංචාරය අතරතුර ඉන්දීය අග්‍රාමාත්‍යවරයාට කුමරුගෙන් විශිෂ්ට පිළිගැනීමක් හිමි වූ බවයි.සිය සොහොයුරෙකු ලෙස සළකන මෝදි ඔහුගේ දෙවන නිවහනට පැමිණි බව කුමරු සඳහන් කර ඇත.
 
මෙහිදී දෙරටේ නායකයින් සාකච්ඡා වටයක් සඳහාත් එක්වුණි. වෙළඳ හා සංස්කෘතික සබඳතා ඔස්සේ ද්විපාර්ශ්වික සබඳතා තවදුරටත් ශක්තිමත් කරගැනීම පිළිබඳව එහිදී ඔවුන් සාකච්ඡා කර ඇති බව විදෙස් වාර්තා වැඩිදුරටත් සඳහන් කළේය.
(125)
(අල්ජසීරා ඇසුරෙනි)