තෙදින නිල සංචාරයක් සඳහා ඇමෙරිකාවට පැමිණි ඉන්දීය අග්‍රාමාත්‍ය නරේන්ද්‍ර මෝදි මහත් හරසරින් පිළිගැනීමට ඇමෙරිකන් ජනාධිපති ජෝ බයිඩන් කටයුතු කළේය.

බයිඩන්ගේ ධුර කාලය මෙම වසරේ අවසන් වන බැවින්, බයිඩන් ඇමෙරිකන් ජනාධිපති ලෙස මෝදි හමුවන අවසන් අවස්ථාව මෙයයි. ද්වීපාර්ශ්වීක සබඳතා තවත් ශක්තිමත් කර ගැනීමේ අරමුණින් රාජ්‍ය නායකයන් දෙදෙනා අතරේ සාකච්ඡා පැවැත්විණි.

ඊට අමතරව රුසියන් යුක්රේන යුද්ධය අවසන් කිරීමට ඉන්දීය අග්‍රාමාත්‍ය මෝදි මැදිහත් වී සිටී. ඒ සම්බන්ධයෙන් ද මෝදි සහ බයිඩන් අතරේ දීර්ඝ වශයෙන් සාකච්ඡා පැවැත්වුණු බව විදෙස් මාධ්‍ය පැහැදිලි කර ඇත.

ඇමෙරිකාවේ ඩෙලවෙයාර් ජනපදයේ විල්මින්ටන් නගරයේ පැවැත්වුණු 'සිවු දෙනාගේ හවුල' හෙවත් 'ක්වඩ්ස්' රාජ්‍ය නායක සමුළුවට ද ඉන්දීය අග්‍රාමාත්‍ය නරේන්ද්‍ර මෝදි සහභාගී විය.

විල්මින්ටන් නගරය යනු බයිඩන් උපන් නගරයයි. 'ක්වඩ්ස්' යනු ඇමෙරිකාව, ඕස්ට්‍රේලියාව, ඉන්දියාව සහ ජපානය යන රටවල එකමුතුවය. ඉන්දීය අග්‍රාමාත්‍ය මෝදිට අමතරව, ජපන් අග්‍රාමාත්‍ය ෆුමියෝ කිෂිඩා සහ ඕස්ට්‍රේලියා අග්‍රාමාත්‍ය ඇන්තනි ඇල්බනීස් ද සමුළුවට සහභාගී වූහ.

ඇමෙරිකාව මැදිහත් වී, ඕස්ට්‍රේලියාව, ඉන්දියාව සහ ජපානය එක් කර ගනිමින් 'ක්වඩ්ස්' හවුල පිහිටුවා ඇත්තේ ආසියානු කලාපයේ චීනයෙන් සහ උතුරු කොරියාවෙන් එල්ල වන තර්ජනවලට මුහුණදීමටය.

(ඒ.එෆ්.පී.)