( තිළිණි ද සිල්වා සහ තුෂාර සිල්වා )

දෙදින නිල සංචාරයක් සඳහා අගමැති මහින්ද රාජපක්ෂ මහතා ලබන සිකුරාදා (19)  බංග්ලාදේශයට  පැමිණෙන බව ටයිම්ස් ඔෆ් ඉන්දියා පුවත් සේවය අද (14) වාර්තා කළේය.

බංග්ලාදේශ රජය කළ නිල ආරාධනයකට අනුව  එරටට යන ශ්‍රී ලංකා අග්‍රාමාත්‍යවරයා මෙම නිල සංචාරයේ නිරත වේ.බංග්ලාදේශය පාකිස්තානයෙන් නිදහස ලබා වසර 50 ක් සැමරීම නිමිත්තෙන් ඩකා අගනුවර පැවැත්වෙන් රාජ්‍ය උත්සව කිහිපයකට හා සැමරුම් උත්සවයට සහභාගී වීම සඳහා මෙම නිල ආරාධනය කර ඇතැයිද පැවසේ.

අග්‍රාමාත්‍ය මහින්ද රාජපක්ෂ මහතාට  අමතරව ඉන්දියාවේ, නේපාලයේ, භූතානයේ සහ මාලදිවයිනේ රාජ්‍ය නායකයින්ද  වෙන වෙනම කාලසටහන් යටතේ මෙම සැමරුම් උත්සවවලට එක්වන සම්භාවනීය විදේශීය අමුත්තන් අතර සිටින බව බංග්ලාදේශ රජයේ ප්‍රධාන තොරතුරු නිලධාරි සුරත් කුමාර් සර්කාර් මහතාගේ ප්‍රකාශයක් උපුටා දක්වමින් ටයිම්ස් ඔෆ් ඉන්දියා පුවත්පත් වාර්තාවේ වැඩිදුරටත් දැක්වේ.

1971 වසරේදී විමුක්ති යුද්ධයෙන් පසු බංග්ලාද්ශ්‍ය පාකිස්තාන පාලනයෙන් නිදහස් වීමේ පනස්වැනි සැමරුම මේ 17 වැනිදා සිට 27 වැනිදා  දක්වා පැවැත්වීමට නියමිතය.

මාලදිවයින් ජනාධිපති ඉබ්‍රාහිම් මොහොමඩ් තෙදින සංචාරයකට මේ 17 වන දින පැමිණෙන අතර අගමැති මහින්ද රාජපක්ෂ මහතා මාර්තු 19 වන දින දෙදින සංචාරයක් සඳහා පැමිණෙනු ඇත.

නේපාල ජනාධිපති බිදියා දේවි භන්දාරි දෙදින සංචාරයක් සඳහා ලබන 22 වැනිදාද , භූතාන අග්‍රාමාත්‍ය ලෝටේ ෂෙරින්ග් 24 වැනිදා ද දක්වා , ඉන්දීය අග්‍රාමාත්‍ය නරේන්ද්‍ර මෝදි මහතා ලබන  26 දින දෙදින සංචාරයක් සඳහා පැමිණෙනු ඇත.

එම සැමරුම් උත්සව කාලසටහනට අනුව ශ්‍රී ලංකා අග්‍රාමාත්‍යවරයා ඇතුළු රාජ්‍ය නායකයින් , 1971 විමුක්ති යුද්ධයේ නිදහස් දිවි පිදූවන්ට උපහාර දැක්වීම, විශේෂ හමුදා පෙළපාළි නැරඹීම, රාජ්‍ය භෝජන සංග්‍රහවලට සහභාගී වීම සහ බංගබන්දු කෞතුකාගාරය නැරඹීම සඳහා ලෝක නායකයින් අගනුවර මායිමේ පිහිටි ජාතික ස්මාරකය නැරඹීමට ද පැමිණෙනු ඇත.