පලස්තිනය වෙනම රාජ්‍යයක් ලෙස පිළිගන්නා බව යුරෝපා රාජ්‍යයක් යන පෘතුගාලය ද පවසා ඇත. පෘතුගාලය මෙසේ තීරනය කළේ ගාසා යුද්ධය අවසන් කිරීමට ඊශ්‍රායලය උනන්දුවක් නොදැක්වීම සම්බන්ධයෙන් කනස්සල්ල පළ කරමිණි.

පෘතුගාලය පවසා ඇත්තේ එක්සත් ජාතීන්ගේ සමුළුව අතරතුරේ තමන් පලස්තීනය වෙනම රාජ්‍යක් ලෙස නිල වශයෙන් පිළිගැනීමට කටයුතු කරන බවය. මෙය ඊශ්‍රායලයේ දැඩි විරෝධයට හේතුවක් වී ඇතැයි ද පැවැසෙයි.

එක්සත් ජාතීන්ගේ සාමාජික රටවල් 193 න් හතරෙන් තුනක් පමණ දැනටමත් පලස්තීන රාජ්‍යයක් පිළිගෙන තිබේ. ඒ අනුව 2012 සිට පලස්තිනයට එක්සත් ජාතීන්ගේ සාමාජිකයකු නොවුණත්, නිරීක්ෂක රාජ්‍යයක තත්ත්වය හිමි වී ඇත.

2023 වසරේ සිට ඊශ්‍රායලය ගාසා තීරයට එල්ල කරන ප්‍රහාර හේතුවෙන් මේ වනවිට ගාසා පලස්තීනුවන් 65,141 මියගොස් ඇතැයි ද පැවැසෙයි. ඊශ්‍රායලය, ගාසා තීරයේ හමාස් ඉලක්කවලට පහර දෙන්නේ, හමාස් සංවිධානය පැහැරගෙන ගොස් ප්‍රාණ ඇපයේ රඳවාගෙන සිටින ඊශ්‍රායල වැසියන් මුදා ගැනීමේ අරමුණින්ය.

ඊශ්‍රායල හමුදා දිගින් දිගටම ගාසා තීරයට ප්‍රහාර එල්ල කරමින් සිටී. ඊශ්‍රායල වැසියන් 47 දෙනකු තවමත් ගාසා තීරයේ හමාස් සටන්කාමින්ගේ ග්‍රහණයේ පසුවන බව වාර්තා වේ. හමාස් සටන්කාමීන් එම ප්‍රාණ ඇපකරුවන් 47 දෙනාගේ ඡායාරූප සහ ඔවුන්ගේ විස්තර ඇතුළත් ඡායාරූපයක් මේ වනවිට මාධ්‍ය වෙත නිකුත් කර ඇත. ඒ, ඔවුන්ට සමුදිමට ඊශ්‍රායලයට සිදුවනු ඇතැයි පවසමිනි. ඊශ්‍රායල රජය පවසා ඇත්තේ ප්‍රාණඇපයේ සිටිනවා යැයි පැවැසෙන එම ඊශ්‍රායල ජාතිකයන්ගෙන් තවමත් ජීවතුන් අතර සිටින්නේ 20 දෙනකු පමණක් බවය.