ඊශ්‍රායල හමුදා ගාසා තීරයට එල්ල කරන ප්‍රහාර නවත්වන්නේ නම් පමණක්, තම ග්‍රහණයේ පසුවන ඊශ්‍රායල ප්‍රාණ ඇපකරුවන් මුදා හැරීම කෙරෙහි අවධානය යොමු කරන බව ගාසා තීරයේ ක්‍රියාත්මක හමාස් සංවිධානය පවසයි.

හමාස් සංවිධානය මෙසේ පැවැසුවේ, ඔවුන්ගේ ග්‍රහණයේ පසුවන ඊශ්‍රායල ප්‍රාණඇපකරුවන් මුදා හරින්නේ නම්, එක් ප්‍රාණ ඇපකරුවකු වෙනුවෙන් ඇමෙරිකන් ඩොලර් මිලියන 5 ක මුදලක් ලබා දීමට තමන් සූදානම් බව ඊශ්‍රායල අග්‍රාමාත්‍ය බෙන්ජමින් නෙදන්යාහු කළ ප්‍රකාශය මුල්කොට ගනිමිනි.

‘අප ග්‍රහණයේ පසුවන ඊශ්‍රායල වැසියන් මුදා හරින්න අප කැමතියි. එසේ කිරීමට නම් ඊශ්‍රායලය යුද්ධය අවසන් කරන්න ඕනෑ. එසේ කළොත් පමණයි අප ඊශ්‍රායල ප්‍රාණ ඇපකරුවන් වෙනුවෙන්, ඊශ්‍රායල අත්අඩංගුවේ සිටින අප සාමාජිකයන් හුවමාරුකට කැමැති වෙන්නේ’ යැයි හමාස් සංවිධානය වැඩි දුරටත් පැහැදිලි කර ඇත.

මේ වනවිට හමාස් සටන්කාමීන්ගේ ග්‍රහණයේ පසුවන ඊශ්‍රායල වැසියන් ගණන 101 කි. එම ප්‍රාණ ඇපකරුවන් අතරේ, විදෙස් සම්භවයක් ඇති සහ විදෙස් පුරවැසිභාවය හිමි ඊශ්‍රායල වැසියෝ ද වෙති.